مادەنيەت جانە اقپارات ءمينيسترى ايدا بالاەۆا دۋمان مۇحامەتكارىمنىڭ ۇستالۋىنا قاتىستى ايتتى، دەپ حابارلايدى Qaz365.kz.

جۋرناليست دۋمان مۇحامەتكارىم قىلمىستىق كودەكستىڭ «تىيىم سالىنعان ۇيىمنىڭ ىسىنە ارالاسۋ» (405-باپتىڭ 2-بولىگى) جانە «ەكسترەميزمدى قارجىلاندىرۋ» (258-باپ، 1-بولىگى) باپتارى بويىنشا كۇدىكتى دەپ تانىلدى. ونىڭ ايىپتالۋىنا وپپوزيتسيالىق ساياساتكەر مۇحتار ابليازوۆپەن سۇحباتى ىقپال ەتتى.

جۋرناليستەر اتالعان جاعدايعا بايلانىستى مينيستر ايدا بالاەۆادان ازاماتتىق ۇستانىمىن سۇرادى.

«ءبىز قۇقىقتىق مەملەكەتتە ءومىر سۇرەمىز. زاڭ بارىمىزگە بىردەي. ەگەر قىلمىستىق ىستەر قوزعالسا، ياعني وعان سەبەپ بار. اقپارات مينيسترلىگى بولسىن، وزگە مينيسترلىك بولسىن نەمەسە جەكە ادامدار بولسىن قۇقىق قورعاۋ ورگاندارىنا ىقپال جاساي المايمىز»، – دەدى ايدا بالاەۆا.

باق وكىلدەرى مينيسترگە دۋمان مۇحامەتكارىمنىڭ ءوز ويىن اشىق ايتقانى ءۇشىن ۇستالعانىن ايتتى.

«ءار ءىستىڭ ەگجەي-تەگجەيىن قاراۋىمىز كەرەك. مەن سىزدەر بىلەتىن اقپاراتتان ارتىق، باسقا اقپارات بىلمەيمىن. سوندىقتان بۇل سۇراققا ناقتى جاۋاپ بەرە المايمىن. ءىس قوزعالدى. قازىر ول كىسى سوتتى كۇتىپ وتىرعانىن عانا بىلەمىن»، – دەپ جاۋاپ بەردى مينيستر.

ەسكە سالايىق، دۋمان مۇحامەتكارىم ماۋسىم ايىندا 25 كۇندىك قاماۋدان شىعۋى كەرەك بولعان. الايدا ونى كەيىن قىلمىستىق ءىس بويىنشا جاۋاپقا تارتىپ جاتقانى بەلگىلى بولدى.

Abai.kz