جەتىسۋ وبلىسىندا ءتۇرلى ەتنوس جاستارىنىڭ قاتىسۋىمەن «ۇزدىك جاس دومبىراشى» وبلىستىق بايقاۋى ءوتتى. جالپى، ءوڭىردىڭ اۋدان-قالالارىندا ۇلتتىق دومبىرا كۇنىنە ارنالعان 50-دەن استام ءىس-شارا وتكىزۋ جوسپارلانعان. سونىڭ ىشىندە شىعارماشىلىق بايقاۋلار، كورمەلەر، ادەبي-مۋزىكالىق كەشتەر، تانىمدىق جانە تاربيەلىك سىنىپ ساعاتتارى، چەللەندجەر، فلەشموبتار، مەرەكەلىك كونتسەرتتەر بار، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

تالدىقورعاندا وتكەن دومبىراشىلار بايقاۋىن «قوعامدىق كەلىسىم» كمم ۇيىمداستىردى. بايقاۋدىڭ نەگىزگى ماقساتى – ءتۇرلى ەتنوس وكىلدەرى اراسىندا قازاقتىڭ ۇلتتىق مادەنيەتى مەن ءداستۇرلى مۋزىكا ونەرىن ناسيحاتتاۋ، ءوڭىردىڭ مادەني ءيميدجىن ارتتىرۋعا ىقپال ەتۋ، دومبىرادا شەبەر ورىندايتىن دارىندى جاس ورىنداۋشىلاردى انىقتاپ، ولاردىڭ شىعارماشىلىق الەۋەتىن قولداۋ.

بايقاۋ بارىسىندا قاتىسۋشىلار حالىق كۇيلەرى مەن قازاقتىڭ ءداستۇرلى مۋزىكا ونەرىنىڭ تۋىندىلارىن ورىنداپ، ءوز ونەرلەرىن پاش ەتتى.

بايقاۋعا قاتىسۋشى ەرشات بايقادانۇلى:

– مەن قاراتال اۋدانىنان كەلدىم. ۇشتوبە قالاسىنداعى بالالار شىعارماشىلىعى ورتالىعىندا دومبىرا سىنىبى بويىنشا ءبىلىم الدىم. دومبىرانى العاش رەت بالا كۇنىمدە كورىپ، وسى ۇلتتىق اسپاپقا دەگەن قىزىعۋشىلىعىم وياندى. كەيىن اتام ماعان دومبىرا سىيلاعان سوڭ، تەگىن ۇيىرمەلەرگە قاتىسا باستادىم. ودان كەيىن مۋزىكا مەكتەبىنە ءتۇسىپ، ۇستازىم جانار تۇتقابەكوۆادان ءتالىم الدىم. بۇگىنگى بايقاۋدا قۇرمانعازىنىڭ «اداي» جانە نۇرعيسا تىلەنديەۆتىڭ «جەكپە-جەك» كۇيلەرىن ورىندادىم. بۇعان دەيىن دە شىمكەنت، اتىراۋ قالالارىندا جانە ەلىمىزدىڭ وزگە وڭىرلەرىندە وتكەن دومبىراشىلار بايقاۋلارىنا قاتىستىم، – دەدى ول.

قاتىسۋشىلاردىڭ تاعى ءبىرى سارقان اۋدانىنان كەلگەن اناستاسيا باناحوۆيچ بايقاۋعا ءبىر ايعا جۋىق ۋاقىت دايىندالعانىن ايتادى.

– بۇگىن اتاقتى كۇيشى-كومپوزيتورلار داۋلەتكەرەيدىڭ «قوس القا»، قۇرمانعازىنىڭ «بالبىراۋىن» كۇيلەرىن شەرتەمىن. مۋزىكالىق بايقاۋلارعا قاتىسقاندا ونى ەڭ باستىسى تاجىريبە الماسۋ دەپ قابىلدايمىن، مەن ءۇشىن جەڭۋ ەمەس، قاتىسۋ ماڭىزدى. سارقان قالاسىنداعى شىعارماشىلىق ۇيىندە ساباق العان سوڭ قازىر ءتورت جىلداي دومبىرا تارتۋدى ۇزبەي جالعاستىرىپ، شەبەرلىگىمدى جەتىلدىرىپ كەلەمىن، - دەدى جاس دومبىراشى.

بايقاۋ قورىتىندىسى بويىنشا ۇزدىك ورىنداۋشىلار دومبىرا بەينەسىندەگى ستاتۋەتكامەن، ديپلومدارمەن، باعالى سىيلىقتارمەن، اقشالاي سىيلىقتارمەن ماراپاتتالدى.

ەسكە سالساق، وبلىس ورتالىعى تالدىقورعاندا 3 شىلدە كۇنى ۇلتتىق دومبىرا كۇنىنە ارنالعان دانەش راقىشەۆ اتىنداعى وبلىستىق فيلارمونيانىڭ مادەني-كوپشىلىك باعدارلاماسى ۇيىمداستىرىلادى. وسى مەرەكەلىك شارادا كورەرمەندەرگە قازاقتىڭ ءداستۇرلى كۇي ونەرى كەڭىنەن ناسيحاتتالدى.

Abai.kz