الماتى قالاسىندا ۇلتتىق دومبىرا كۇنىنە وراي قالا اكىمدىگىنىڭ قولداۋىمەن «دومبىرا – داستان» اتتى اۋقىمدى مەرەكەلىك كونتسەرت ۇيىمداستىرىلدى. الاتاۋ ءداستۇرلى ونەر تەاترىنىڭ اشىق الاڭىندا وتكەن مادەني شاراعا مىڭداعان قالا تۇرعىندارى مەن قوناقتارى جينالىپ، قازاقتىڭ ءتول ونەرى مەن ۇلتتىق مادەنيەتىنىڭ مەرەيىن اسىرعان ەرەكشە كەشتىڭ كۋاسى بولدى.

كەش بارىسىندا ەلىمىزدىڭ تانىمال ءداستۇرلى جانە ەسترادا ونەرپازدارى ءبىر ساحنادا باس قوسىپ، كورەرمەنگە ۇلتتىق ناقىشتاعى باي كونتسەرتتىك باعدارلاما ۇسىندى. ساحنا تورىندە «مۋزارت» توبى، رامازان ستامعازيەۆ، ايگۇل قوسانوۆا، باعلان ءبابىجان، تىلەۋلەس قۇرمانعاليەۆ، نۇركەن ءاشىروۆ، ۇلجان بايبوسىنوۆا، شولپان دارجانوۆا، مۇرات ابۋعازى، ارداق يساتاەۆا، ارداق ەلەۋسىز، توعجان ۇمبەت، ەركىن شۇكىمان، سايا ماحامبەت، «قوڭىر» توبى، «قۇرمانعازى» وركەسترى، «سالتانات» بي ءانسامبلى ونەر كورسەتىپ، ۇلتتىق ونەردىڭ تەرەڭ تامىرى مەن ومىرشەڭدىگىن ايشىقتايتىن اسەرلى تۋىندىلارىن ورىندادى.

كونتسەرت بارىسىندا كۇي مەن تەرمە، حالىق اندەرى مەن زاماناۋي مۋزىكالىق شىعارمالار ۇندەسىپ، ۇلتتىق ونەردىڭ ءداستۇرى مەن بۇگىنگى تىنىسىن توعىستىرعان مازمۇندى مادەني باعدارلاما ۇسىنىلدى. دومبىرانىڭ كۇمبىرلەگەن ءۇنى كورەرمەنگە حالقىمىزدىڭ تاريحىن، رۋحىن، ەلدىك مۇراتىن جانە ۇلتتىق بىرەگەيلىگىن تەرەڭ سەزىندىرىپ، ەرەكشە رۋحاني اسەر سىيلادى.

«دومبىرا – داستان» مەرەكەلىك كونتسەرتى قالا تۇرعىندارى مەن قوناقتارىنا كوتەرىڭكى كوڭىل كۇي مەن جارقىن ەموتسيا سىيلادى. اشىق اسپان استىنداعى مادەني كەش ۇلتتىق ونەردى دارىپتەيتىن ماڭىزدى الاڭعا اينالىپ، ءتۇرلى بۋىن وكىلدەرىن ورتاق رۋحاني قۇندىلىقتار توڭىرەگىندە توعىستىردى.

Abai.kz