ءماجىلىس توراعاسى پرەزيدەنتتىڭ تۇركيا رەسپۋبليكاسىنىڭ 100 جىلدىق مەرەيتويمەن قۇتتىقتاۋىن وقىپ بەردى
![](https://abai.kz/content/uploads/2023/10/1ef66cfe-444b-4ce8-9f43-2a570bd762b7.jpeg)
ءماجىلىس توراعاسى ەرلان قوشانوۆ تۇركيا رەسپۋبليكاسىنىڭ 100 جىلدىعىنا ارنالعان قابىلداۋدا مەملەكەت باسشىسى قاسىم-جومارت توقاەۆتىڭ 100 جىلدىق مەرەيتويمەن قۇتتىقتاۋىن وقىپ بەردى.
«باۋىرلاس تۇرىك حالقىن ەلىڭىزدىڭ تاريحىنداعى ايتۋلى وقيعا — تۇركيا رەسپۋبليكاسىنڭ 100 جىلدىعىمەن شىن جۇرەكتەن قۇتتىقتايمىن. تەرەڭگە جايىلعان اسىل تاريحىنان، باي مادەني مۇراسىنان، حالقىنىڭ قايسارلىعى مەن دانالىعىنان باستاۋ الاتىن بۇگىنگى انادولى قارقىندى دامۋعا قول جەتكىزىپ، جاھاندىق دەڭگەيدەگى كوشباسشى ءاpi قۋاتتى ەلدەردىڭ قاتارىنا ەنگەنىن ەرەكشە قۋانىشپەن اتاپ وتەمىن. ءسىزدىڭ ساليقالى دا كەرەگەن ساياساتىڭىز، قاجىرلى كۇش-جىگەرىڭىز بەن يگى باستامالارىڭىز ەلىڭىزدى جاڭا التىن عاسىرعا قادام باستاپ، بيىك ماقسات-مۇراتتارعا جەتەلەي بەرۋىنە شىنايى تىلەكتەسپىن»، – دەلىنگەن پرەزيدەنت قۇتتىقتاۋىندا.
مەملەكەت باسشىسى قازاقستان مەن تۇركيانىڭ بەرىك دوستىق پەن ءوزارا قولداۋعا نەگىزدەلگەن قارىم-قاتىناستارى اعايىن حالىقتارىمىزدىڭ يگىلىگى ءۇشىن كەڭەيتىلگەن ستراتەگيالىق ارىپتەستىك رۋحىندا عاسىردان عاسىرعا جالعاسا بەرەتىنىنە كامىل سەنەتىنىن ايتقان.
ەرلان قوشانوۆ قاراعاندى وبلىسىنداعى شاحتاداعى قايعىلى وقيعاعا بايلانىستى قازاقستان حالقىنا قولداۋ ءبىلدىرىپ جاتقان تۇركيا باسشىلىعىنا جانە ديپلوماتيالىق كورپۋس وكىلدەرىنە العىسىن جەتكىزدى.
پالاتا توراعاسى ەلدەرىمىزدىڭ پارلامەنت دەڭگەيىندەگى جانە تۇركپا سياقتى حالىقارالىق الاڭدار اياسىنداعى ىنتىماقتاستىعىنا توقتالدى.
سونىمەن قاتار ءماجىلىس سپيكەرى تۇركيانىڭ 100 جىلدىق مەرەيتويىنا وراي استانادا «انادولى» كوشەسى، شىمكەنتتە «تۇركيا» داڭعىلى مەن ساياباعى، الماتىدا مۇستافا اتاتۇرىككە ارنالعان ەسكەرتكىش اشىلعالى جاتقانىن ايتتى. ال 26 قازاندا ەلورداداعى «اتاتۇرىك» ساياباعىندا يۋنۋس ەمرەگە ارنالعان ەڭسەلى ەسكەرتكىش اشىلدى.
Abai.kz