كەلەر جىلى قازاقستاندا قازاق-فرانتسۋز ۋنيۆەرسيتەتى اشىلادى. بۇل تۋرالى فرانتسيا پرەزيدەنتى ەممانۋەل ماكرون قاسىم-جومارت توقاەۆپەن كەلىسسوز جۇرگىزگەننەن كەيىن مالىمدەدى، دەپ حابارلايدى Ulysmedia.kz.

ماكرون فرانتسيا قازاقستانمەن مادەني-گۋمانيتارلىق بايلانىستاردى كەڭەيتۋگە نيەتتى ەكەنىن جەتكىزدى.

"ەكى ەلدىڭ ءبىلىم بەرۋ ۇيىمدارى اراسىندا قول قويىلعان ۇكىمەتارالىق كەلىسىمگە ۇلكەن ءۇمىت ارتىپ وتىرمىن. مىسالى، مەن سەرىكتەستىگىمىزدىڭ جاڭارعانىنا وتە قۋانىشتىمىن جانە 2024 جىلدىڭ قىركۇيەگىنەن باستاپ فرانتسۋز-قازاق ۋنيۆەرسيتەتى  جۇمىس ىستەي باستايدى", – دەدى فرانتسۋز باسشىسى.

عىلىم جانە جوعارى ءبىلىم ءمينيسترى ساياسات نۇربەكتىڭ جاڭا ۋنيۆەرسيتەت قازاقستان-گەرمانيا ۋنيۆەرسيتەتىنە ۇقساس قۇرىلاتىنىن ايتتى.

ء"بىز بۇل ماسەلەنى زەرتتەۋ ءۇشىن جەكە جۇمىس توبىن قۇرامىز، سونىمەن قاتار فرانتسيانىڭ مىقتى ۋنيۆەرسيتەتتەرىن تارتا وتىرىپ، وڭىرلىك ۋنيۆەرسيتەتتەردە عىلىمي-زەرتتەۋ بولىمشەلەرىن اشۋ مۇمكىندىگىن تالقىلايمىز", – دەدى مينيستر.

ايتا كەتەيىك، بۇدان بۇرىن ماكرون قازاقستان مەكتەپتەرىندە فرانتسۋز ءتىلى قايتا وقىتىلا باستاعانىن قالايتىنىن مالىمدەدى.

Abai.kz