وتاندىق كينو يندۋستريا تاعى ءبىر تۋىندىمەن تولىقتى. الماتىدا «Burkit» دەپ اتالاتىن ەكشن-ءفيلمىنىڭ تۇساۋكەسەرى ءوتتى. جاڭا فيلم ۇلتتىق ۇلاننىڭ قۇرامىنا كىرەتىن ارنايى جاساقتىڭ قيىن دا قاۋىپتى قىزمەتىنە ارنالعان. كارتينا ەلىمىزدىڭ مادەنيەت جانە اقپارات مينيسترلىگى تاپسىرىسى بويىنشا «ۇلتتىق كينونى قولداۋ مەملەكەتتىك ورتالىعى» كومەگىمەن ءتۇسىرىلدى.

تۋىندى جەلىسىنە ارنايى جاساقتا قىزمەت ەتەتىن ءۇش جاۋىنگەردىڭ دوستىعى ارقاۋ بولعان. ولاردىڭ كۇندەلىكتى مىندەتى – قاۋىپتى قىلمىستىق توپتارعا قارسى تۇرۋ. سونداي قىلمىستىق توپقا قارسى تەكەتىرەستىڭ بىرىندە ءۇش جاۋىنگەردىڭ دوستىعى سىنالادى.

قۇرمانبەك جۇماعالي، "ۇلتتىق كينونى قولداۋ مەملەكەتتىك ورتالىعى" كەاق باسقارما توراعاسى:

- جاۋىنگەرلەر  اراسىندا كۇرەڭ بەرەت دەگەن وزدەرىنىڭ ارنايى اتاعى بار. قازاقستان بويىنشا وسى جىلدارى تەك قانا 200 اسكەردە جۇرگەن ازاماتتار سول كۇرەڭ بەرەتتى العان ەكەن. سولاردىڭ ءومىرى كۇندەلىكتى قالاي شىڭدالاتىندىعى، قالاي وزدەرىنىڭ قىزمەتىن اتقاراتىندىعى جايىندا بۇگە شىگەسىنە دەيىن كورسەتىلدى.

«Burkit» رەجيسسەر دانيار يبراگيموۆتىڭ دەبيۋتتىك ءفيلمى. ول بۇعان دەيىن وتاندىق «التىنشى پوست» جانە «قازبات» اسكەري ەكشن-فيلمدەرىنىڭ پروديۋسەرى بولعان.

ءفيلمنىڭ تۇسىرىلىمىنە ارنايى جاساق، اسكەري تەحنيكا مەن اۆياتسيا، سونداي-اق ەكى جۇزدەن استام مەرزىمدى اسكەري قىزمەتشى قاتىسقان. جەدەل-ىزدەستىرۋ شارالارى ارقاۋ بولعان كارتينانىڭ كەيبىر ەپيزودتارى شىنايى وقيعالارعا نەگىزدەلگەن. ءتۇسىرىلىم الماتى وبلىسىنىڭ كورىكتى جەرلەرىندە، ەسىك تاۋلارى مەن ىلە وزەنىندە ءوتتى.

قايرات ۇمبەتوۆ، قر ۇلتتىق ۇلانى باس قولباسشىسىنىڭ ورىنباسارى:

- كوركەم فيلمدە قر-نىڭ ارنايى ماقساتتاعى قىزمەت قىزمەتكەرلەرىنىڭ كۇندەلىكتى ورىنداپ وتىرعان جۇمىسى اسكەري دوستىعى مەن قارىم- قاتىناستارى جانە قازىرگى تاڭداعى ەلىمىزدىڭ اتقارىپ وتىرعان قىزمەتشىلەرىنە ارنالعان كوركەم فيلم. اكتەرلىق قۇرام ءتۇسىرىلىم جۇمىستارىنا كىرىسپەس بۇرىن بىرنەشە اپتا بويى جاۋىنگەرلىك قيمىلداردى ۇيرەندى. ءتىپتى باستى كەيىپكەرلەرگە ءبىر مەزەتتە 3 مىڭ مەتر بيىكتىكتەن تىكۇشاقتان پاراشيۋتپەن سەكىرۋگە تۋرا كەلدى. ال بۇل كادردى ءتۇسىرۋ ءۇشىن وپەراتورلاردىڭ وزدەرى دە پاراشيۋتپەن سەكىرگەن.

سانجار ءمادي، اكتيور:

- وسى فيلمدە مەنىڭ اتىم فەنيكس. وسى فيلمدە وتە قيىن ءتۇسىرىلىم بولدى نەگىزى. ساربازدىڭ كيىمى وتە اۋىر. 50 كگ. باسقا تارتاتىن شلەم 15 كگ بولدى. ءفيلمنىڭ قويۋشى وپەراتورى ازامات دۋلاتوۆ، پروديۋسەرى جانە اسكەري كەڭەسشىسى وتستاۆكاداعى پولكوۆنيك كامال جاقسىلىقوۆ.

باستى رولدەردە داۋرەن سەرعازين، سانجار ءمادي، اسىلحان تولەپوۆ، گۇلناز جولانوۆا، اسەل ساعاتوۆا، جاندوس ايباسوۆ جانە ازامات ساتىبالدى وينايدى.

تۋىندى كينوكارتينانىڭ كەيىپكەرلەرى ارقىلى وتانعا دەگەن سۇيىسپەنشىلىكتى، دوستىق پەن ءپاتريوتيزمدى، اسكەري انتقا جانە قىزمەتتىك مىندەتكە دەگەن ادالدىقتى دارىپتەيدى. ءفيلمدى كينوتەاترلاردان كورۋگە بولادى.

Abai.kz