بەلسەندى، "العا قازاقستان" تىركەلمەگەن وپپوزيتسيالىق ۇيىمىنىڭ جەتەكشىسى مارات جىلانباەۆ اشىق سوت تالاپ ەتىپ، اۋزىن تىگىپ تاستادى.

2 قاراشادا 1612 Info تەلەگرام-ارناسى سوت قۇجاتىنا "قارسىلىق رەتىندە مەن اۋزىمدى تىگىپ تاستادىم" دەگەن جازۋى بار قاعاز ۇستاپ تۇرعان مارات جىلانباەۆتىڭ سۋرەتى مەن وتە قىسقا ۆيدەوسىن جاريالاعان. اقپاراتتى ادۆوكاتى راستاعانمەن ءوزى پروتسەستە وتىرعاندىقتان ءمان-جايدى تولىق تۇسىندىرە المادى.

استانا قالاسىنىڭ قىلمىستىق اتقارۋ جۇيەسى دەپارتامەنتى مارات جىلانباەۆتىڭ اۋزىن تىگىپ تاستاعانىن راستادى.

"1 قاراشادا سوتتالۋشى مارات جىلانباەۆ اۋزىن جىپپەن تىگىپ، تاماقتان باس تارتۋ تۋرالى ارىز بەرگەن. ول ءوز ارەكەتىن استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ 2 قاراشاعا بەلگىلەنگەن سوت وتىرىسىنن جابىق وتكىزۋ تۋرالى شەشىمىمەن كەلىسپەيتىندىگىمەن تۇسىندىرەدى. ونىڭ مەكەمە اكىمشىلىگىنىڭ قىزمەتكەرلەرىنە شاعىمى جوق. سول كۇنى مەكەمە باسشىلىعىمەن پروفيلاكتيكالىق اڭگىمە جۇرگىزىلگەننەن كەيىن سوتتالۋشى مارات جىلانباەۆ تىگىسىن الىپ تاستادى" دەپ جازىلعان قاجد حابارلاماسىندا.

دەپارتامەنتتىڭ حابارلاۋىنشا، مارات جىلانباەۆتىڭ "جاعدايى قاناعاتتارلىق، دەنساۋلىعىنا شاعىم جوق. "ول قوسىمشا تەكسەرۋلەردەن جانە مەديتسينالىق مامانداردىڭ كەڭەسىنەن باس تارتتى" دەدى دەپارتامەنت وكىلدەرى.

ازىرگە ازاتتىق مارات جىلانباەۆتىڭ جاعدايى جونىندە ادۆوكاتىنان بىلە المادى.

30 قازاندا استانادا مارات جىلانباەۆتىڭ سوتى باستالعان ەدى. العاشقى وتىرىستا سۋديا اتى-جوندەرى اتالماعان كۋاگەرلەردىڭ ءوتىنىشىن العا تارتىپ، سوتتى جابىق ەتكەن ەدى. قورعاۋ تارابى سوتقا سەنىمسىزدىك بىلدىرگەنمەن ءوتىنىشى كەرى قايتارىلعان.

سول سوتتا مارات جىلانباەۆ سوت پروتسەسىن اشىق جۇرگىزۋدى سۇراعان.

— سوتتى جابىق وتكىزۋ - زاڭعا، كونستيتۋتسياعا قايشى. ەشقانداي ءتارتىپ بۇزعان جوقپىن، مۇنى سوتتا دالەلدەگىم كەلەدى. ەگەر جابىق سوت بولاتىن بولسا، مەنى "قانشا بەرسە" سونشا ۋاقىتقا قامايدى،- دەدى ول.

قازىر بەلسەندىنىڭ سوتى اقپارات قۇرالدارىنىڭ قاتىسۋىنسىز جابىق ءوتىپ جاتىر. بۇعان دەيىن قۇقىق قورعاۋشىلار مەن بەلسەندىلەر "ساياسيلانعان ءىس بويىنشا" سوتتىڭ جابىق ءوتۋىن سىناعان.

مارات جىلانباەۆ بيىل كەزەكتەن تىس پارلامەنت سايلاۋىنا دەپۋتاتتىقتان ۇمىتكەر رەتىندە تىركەلگەن. بيلىك "ەرتە ۇگىت-ناسيحات جاسادى" دەپ ايىپتاپ، كانديداتتار قاتارىنان الىپ تاستادى.

ءوزىنىڭ سايلاۋالدى باعدارلاماسىندا جىلانباەۆ قاڭتار وقيعاسىن تەرگەۋدى، قانتوگىستەن زارداپ شەككەندەرگە وتەماقى تولەۋدى، بۇرىنعى پرەزيدەنت نۇرسۇلتان نازارباەۆ پەن ونىڭ وتباسىنا قاتىستى تەرگەۋ جۇرگىزۋگە شاقىرعان.

الەمنىڭ 39 ەلىندە دەموكراتيا بەلسەندىلەرى مەن قۇقىق قورعاۋشىلار، ادۆوكاتتار مەن جۋرناليستەردى بىرىكتىرەتىن World Liberty Congress ۇكىمەتتىك ەمەس ۇيىمى جۋىردا "مارات جىلانباەۆ ءجون-جوسىقسىز ۇستالدى" دەپ تانىعان.

دەرەككوز: centralasian

Abai.kz