«تۇركى الەمى» اتتى جاڭا برەندتى دارىپتەۋىمىز كەرەك. بۇل تۋرالى اقوردادا ءوتىپ جاتقان تۇركى مەملەكەتتەرى ۇيىمىنىڭ ح سامميتىندە مەملەكەت باسشىسى قاسىم-جومارت توقاەۆ ايتتى.

«تۇركى جۇرتى بايكالدان بالقانعا دەيىنگى ۇلان-عايىر اۋماقتى جايلاپ جاتىر. تۇركى الەمىنىڭ وركەنيەتى ۇلى دالادان باستاۋ الاتىنى بارشاعا ءمالىم. وسى ورتاق قۇندىلىقتارىمىزدىڭ مۇراگەرى — تۇركى مەملەكەتتەرى ۇيىمى. قازاقستان تۇركى مەملەكەتتەرى ۇيىمىن ودان ءارى دامىتۋعا مۇددەلى. تۇركى ىقپالداستىعىن تەرەڭدەتۋ — ورتاق مۇرات. ءبىز „تۇركى الەمى“ اتتى جاڭا برەندتى دارىپتەۋىمىز كەرەك. سوندا عانا تۇركى حالىقتارىنىڭ ىنتىماعى بارىنشا نىعايىپ، الەۋەتى ارتا تۇسەدى»، — دەدى پرەزيدەنت.

مەملەكەت باسشىسى قازاقستان ۇيىمعا توراعا رەتىندە ءوزارا ءىس-قيمىلدى جانداندىرۋعا باسا ءمان بەرىپ وتىرعانىن باسا ايتتى.

«سونداي-اق ءبىز ءتۇرلى سالاداعى بايلانىستى ورنىقتىرۋعا، حالىقارالىق بەدەلىمىزدى كوتەرۋگە كۇش سالامىز. تۇركى بىرلىگىن تانىتۋ ءۇشىن ءبىزدىڭ توراعالىعىمىز „تۇركى ءداۋىرى!“، ياعني „TURKTIME!“ ۇرانىمەن وتەدى. وسىعان وراي، سالت-ءداستۇر (Traditions), بىرىزدەندىرۋ (Unification), رەفورمالار (Reforms), عىلىم (Knowledge), سەنىم (Trust), ينۆەستيتسيا (Investments), مەدياتسيا (Mediation) جانە ەنەرگيا (Energy) اتتى سەگىز ماسەلەگە باسىمدىق بەرەمىز. بۇل باسىمدىقتار ۇيىمنىڭ 20-شى سامميتىنە دەيىنگى ون جىلدى قامتيتىن قىسقا جانە ورتا مەرزىمگە ارنالعان»، — دەدى قاسىم-جومارت توقاەۆ.

Abai.kz