وزبەكستان پرەزيدەنتى شاۆكات ميرزيوەۆ مەملەكەتتىڭ زايىرلىلىعىن ايقىندايتىن قىلمىستىق كودەكس پەن اكىمشىلىك جاۋاپكەرشىلىك تۋرالى كودەكسكە ەنگىزىلگەن تۇزەتۋلەردى بەكىتەتىن زاڭعا قول قويدى.

ادىلەت مينيسترلىگىنىڭ مالىمەتىنە ساي، زاڭناماعا ەنگىزىلگەن تۇزەتۋلەر كوپ ايەل الۋدى ناسيحاتتاۋ، احاج-دا رەسمي نەكە قيماي «نيكوح» ءراسىمىن جاساۋ، گەندەرلىك كەمسىتۋ، سونداي-اق قوعامدىق ورىندا جەكە باسىن انىقتاۋعا مۇمكىندىك بولمايتىنداي دارەجەدە جابىق كيىم كيگەندەرگە قولدانىلاتىن جاۋاپكەرشىلىكتەردى قامتيدى.

«ەكى جانە ودان دا كوپ ايەلمەن بىرگە تۇرۋدى ناسيحاتتاۋ، وسى تۇرعىدا يدەيا نەمەسە ۇندەۋ تاراتۋ، سونداي-اق مۇنداي ارەكەتتەردى قولداۋ 15-تەن 30 بازالىق ەسەپتىك شاماعا (بەش) دەيىن نەمەسە 4,950 ميلليوننان 9,9 ملن سوماعا دەيىن مولشەردە ايىپپۇل سالۋ نەمەسە 15 تاۋلىككە دەيىن اكىمشىلىك قاماۋعا الۋمەن جازالانادى»، - دەلىنگەن وزبەكستان ادىلەت مينيسترلىگىنىڭ مالىمەتىندە.

نەكەسى زاڭدى تىركەلمەگەن ادامدار اراسىندا، ونىڭ ىشىندە نەكە جاسىنا تولماعاندارمەن وتباسىن قۇرۋ بويىنشا ءدىني ءراسىم جاساعاندارعا 15-تەن 30 بازالىق ەسەپتىك شاماعا دەيىن ايىپپۇل سالىنادى.

گەندەرلىك كەمسىتۋدى ناسيحاتتاۋ، ايەلدەر مەن ەرلەردىڭ تەڭ قۇقىعىن اشىق تۇردە جوققا شىعارۋ، وسى باعىتتاعى يدەيالار مەن ۇندەۋلەردى تاراتۋ 10-نان 20 بەش-كە دەيىن نەمەسە 3,3-6,6 ميلليون سۋم ايىپپۇلمەن جازالانادى.

بۇدان باسقا، جەكە باسىن انىقتاۋعا مۇمكىندىك بەرمەيتىندەي بۇركەنىپ كيىنگەن ادامداردىڭ قوعامدىق ورىنداردا بولعانى ءۇشىن جازا ەنگىزىلىپ وتىر. وسىنداي ارەكەت ءۇشىن 3,3 - 4,95 ملن سۋم ارالىعىندا ايىپپۇل تاعايىندالادى.

ۆەدومستۆودان اتاپ وتكەندەي، ءتيىستى وزگەرىستەر زاڭ رەسمي جاريالانعان كۇنىنەن باستاپ كۇشىنە ەنەدى.

فوتو: اشىق دەرەككوزدەن

Abai.kz