ەلىمىزدە جەمقورلىق قىلمىسى بويىنشا سوتتالعان ازاماتتاردىڭ ءتىزىمى ارنايى سايتتا جاريالانادى. مۇنى بۇۇ اياسىندا تاشكەنتتە (وزبەكستان) ءوتىپ جاتقان ايماقتىق كونفەرەنتسيادا قر سىبايلاس جەمقورلىققا قارسى ءىس-قيمىل اگەنتتىگى 1-ءشى قىزمەت باسشىسىنىڭ ورىنباسارى جىگەر ءبايدىلدين ايتتى.

«قوعامدىق باقىلاۋدى كۇشەيتۋ ءۇشىن جەمقورلاردىڭ ءتىزىمىن جاريالاۋ سياقتى زاڭنامالىق نورمالار پىسىقتالىپ جاتىر. ەگەر لاۋازىمدى تۇلعا نەمەسە شەنەۋلىككە قاتىستى سوت ۇكىمى شىعاتىن بولسا، وندا ول ۋاكىلەتتى ورگانمەن (سىبايلاس جەمقورلىققا قارسى ءىس-قيمىل اگەنتتىگى – اۆت.) رەەسترگە ەنگىزىلەدى. بۇل – سايتتا جاريا بولادى. كەز-كەلگەن ازامات ونلاين تۇردە سول سايتقا كىرىپ، قانداي لاۋازىمدى تۇلعا قانشاعا، قانداي باپ بويىنشا سوتتالدى دەگەن سياقتى دەرەكتەردى كورە الادى»، - دەپ ءتۇسىندىردى جىگەر ءبايدىلدين Kazinform ءتىلشىسىنىڭ ساۋالىنا جاۋاپ بەرە وتىرىپ.

ول اتاپ وتكەندەي، پاراقورلار ءتىزىمىن جاريالاۋ بويىنشا اۋەلى زاڭنامالىق اكتىلەردى قابىلداۋ قاجەت. اگەنتتىك دەرەگىنشە، بەكىتىلۋى مۇمكىن ەرەجە ەشكىمنىڭ زاڭدى قۇقىعىن شەكتەمەۋى جانە قر كونستيتۋتسياسىنىڭ تالاپتارىنا قايشى بولماۋى ءتيىس.

ۆەدومستۆونىڭ رەسمي وكىلى ارمان تىلەۋكەنوۆتىڭ ايتۋىنشا، بۇل جۇيە جۇمىس بەرۋشىلەر ءۇشىن ءتيىمدى بولماق. ناقتى توقتالساق، قانداي دا ءبىر كانديداتتى قىزمەتكە الماس بۇرىن، باسشى سول سايتقا كىرىپ، ول ۇمىتكەردىڭ جەمقورلىق جاساعان-جاساماعانىن بىلە الادى.

سوت ۇكىمىنە ساي جازاسىن وتەپ، مەملەكەتتىك قىزمەتتە جۇمىس ىستەۋىنە سالىنعان تىيىم ۋاقىتىن وتكەرگەننەن كەيىن رەەستردە تۇرعان ازاماتتاردىڭ دەرەكتەرى تىزىمنەن الىنىپ تاستالۋى مۇمكىن. سىبايلاس جەمقورلىققا قارسى قىزمەت اگەنتتىگى ازىرگە بۇل تالاپتاردى پىسىقتاپ جاتىر.

Abai.kz