قازاقستان تەمىرجولىنا قاراستى «قاراعاندى ماگيسترالدىق جەلى بولىمشەسى» قىزمەتكەرلەرىنىڭ ساۋىقتىرۋ ءۇشىن قاراجات جۇمساۋ كەزىندە زاڭدىلىقتىڭ ساقتالۋىنا تالداۋ جۇرگىزىلدى، دەپ حابارلايدى Ulysmedia.kz.

باس كولىك پروكۋراتۋراسىنىڭ مالىمەتىنشە، قتج مەن ونىڭ ەڭبەك ۇجىمى اراسىندا جاسالعان ۇجىمدىق شارتتا جۇمىس بەرۋشى مۇقتاج جۇمىسشىلارعا جەڭىلدىك شارتتارىمەن ساناتورلىق-كۋرورتتىق ەمدەلۋگە جولدامالار بەرۋگە نەمەسە مەديتسينالىق كورسەتكىشتەر بولعان جاعدايدا 60 اەك مولشەرىندە ماتەريالدىق كومەك كورسەتۋگە مىندەتتى ەكەندىگى كورسەتىلگەن.

وسى قۇجاتقا سايكەس تەمىرجول سالاسىنىڭ قىزمەتكەرلەرى ءار 3 جىل سايىن ەمدىك ساناتوريلەرگە جولداما الادى. وسىعان قوسا بارلىق قارجىلىق شىعىنداردى ۇلتتىق تاسىمالداۋشى كوتەرەدى.

الايدا قتج ەسەپتەرى مەن كۋرورتتىق ۇيىمداردىڭ اقپاراتتارىن سالىستىرۋ قتج فيليالىنىڭ ەمدەلۋدى قاجەت ەتەتىن ءاربىر ءۇشىنشى قىزمەتكەرى ساناتوريدە ىس جۇزىندە كەلمەگەنىن جانە ءتيىستى پروتسەدۋرالاردى الماعانىن كورسەتتى.

“مىسالى، ازامات ا. وسى جىلدىڭ ناۋرىز ايىندا ساۋىقتىرۋ ورتالىعىندا دەمالعانى تۋرالى قۇجاتتار ۇسىنعان. الايدا مەديتسينالىق مەكەمەنىڭ جاۋابىنان كورسەتىلگەن ادامنىڭ ولاردا بولماعانى انىقتالدى. جالپى العاندا پروكۋراتۋرا قاراعاندى وبلىسىنىڭ تەمىرجول سالاسى قىزمەتكەرلەرىنىڭ كۋرورتتىق ۇيىمداردىڭ قىزمەتتەرىن الۋ تۋرالى وسىعان ۇقساس 100 جالعان ەسەپتەرىن انىقتادى”، – دەلىنگەن حابارلامادا.

الاياقتىق نەگىزىندە سوتقا دەيىنگى تەرگەپ-تەكسەرۋ باستالدى، ونى جۇرگىزۋ كولىكتەگى پوليتسياعا تاپسىرىلدى.

ايتا كەتەيىك، بۇدان بۇرىن كولىك پروكۋرورلارى «قتج-جۇك تاسىمالى» جشس-ءنىڭ فيليالدارىندا قارجىلاندىرۋعا جاتپايتىن 742 ادامعا 10 ملن تەڭگەدەن استام سوماعا سىياقىلار مەن تولەمدەردى زاڭسىز ەسەپتەۋ فاكتىلەرىن انىقتاعان.

كاسىپورىننىڭ اقمولا فيليالى ومىردەن جەتى جىل بۇرىن وتكەن زەينەتكەر اتىنا اقشالاي قاراجات اۋدارىپ وتىرعان. بۇدان بولەك، قاراعاندىدا كادر ءبولىمىنىڭ باسشىسى اتا-اناسىن تەمىرجولشى زەينەتكەرى رەتىندە زاڭسىز تىزىمگە قوسىپ، ولارعا بەس جىل بويى 1 ملن تەڭگەدەن استام سوماعا جەڭىلدىكتەر، وتەماقى تولەمدەرى مەن سىيلىقاقىلاردى بەرىپ وتىرعان.

Abai.kz