يزرايل سىرتقى ىستەر مينيسترلىگى ەۋرازيا جانە بالقان ماسەلەلەرى جونىندەگى باس ديرەكتورىنىڭ ورىنباسارى سيمونا گالپەرين گازادا قالعان 76 قازاقستاندىقتىڭ امان-ەسەن ورالۋى مىسىر بيلىگى مەن حاماس-تىڭ ارەكەتىنە بايلانىستى ەكەنىن ايتتى.

«گازادا قالعان قازاقستاندىقتار دا سونداعى بىرنەشە مىڭ شەتەلدىك سياقتى جاعدايدا. ءبىز قازاقستان تاراپىنان دا وزگە ءتۇرلى ەلدەر سياقتى سونداعى ازاماتتارىنىڭ ءتىزىمىن الدىق. يزرايل تاراپى ولاردىڭ گازادان شىعۋىنا ەشقانداي قارسىلىعىمىز جوق. كەرىسىنشە قولدايمىز، مۇمكىن بولعانشا گازادان شىعۋىنا كۇش سالامىز. پروبلەما قايدا؟ بىرىنشىدەن، مىسىر ارقىلى شىعۋ كەرەك ەدى. مىسىرلىقتار شەتەلدىكتەردىڭ گازادان ءوز شەكاراسى ارقىلى شىعۋىنا وتكەن اپتادا عانا رۇقسات بەرە باستادى. ءۇش اپتا بويى وندايعا رۇقسات بەرگەن جوق. قازىر رۇقسات بەرگەنىمەن، كۇن سايىن شىعاتىن ادام سانىن شەكتەپ وتىر. ءار كۇن سايىن 500-600 ادامنان اسپاي تۇر. گازادا شامامەن 7 مىڭ شەتەلدىك بولسا، كۇن سايىن 500 ادام دەگەندە، ءبارىنىڭ شىعۋى ءۇشىن 2 اپتاداي ۋاقىت كەتۋى مۇمكىن. ول جاقتا كەزەك قالاي قۇرىلىپ، قالاي شىعارىلىپ جاتقانىن بىلمەيمىن. بىراق ءبىز بۇكىل ءتىزىمدى بەردىك»، - دەدى يزرايل ءسىم وكىلى تاياۋ شىعىستاعى اۋحال تۋرالى بريفينگىدە.

سونداي-اق ول حاماس-تىڭ شەتەلدىكتەردى دە ءتىرى قالقان رەتىندە ۇستاپ وتىرعانىن ايتتى.

«الدىڭعى كۇنى جانە كەشە نە بولدى؟ بۇل كۇندەرى حاماس تۇتقىنداعىلاردىڭ شىعۋىنا رۇقسات بەرمەدى. وزدەرىڭىز بىلەسىزدەر، ول جەردە يزرايلدىكتەر عانا ەمەس، پالەستيندىكتەر دە كەپىلدىكتە وتىر. ەندى سونداعى شەتەلدىكتەردى جىبەرگىسى كەلمەي وتىر. سوندىقتان يزرايل تاراپىنان شەكتەۋ نەمەسە پروبلەما جوق. بىزگە اسكەري وپەراتسيا ءجۇرىپ جاتقان گازادان بەيبىت ازاماتتار نەعۇرلىم كوبىرەك شىعىپ، حاماس قانا قالعانى كەرەك»، - دەدى سيمونا گالپەرين.

سىرتقى ىستەر مينيسترلىگىنىڭ مالىمەتى بويىنشا، گازا سەكتورىندا قازىر قازاقستاننىڭ 76 ازاماتى بار.

«ءبىزدىڭ دەرەكتەرىمىز بويىنشا گازا سەكتورىندا قازاقستان رەسپۋبليكاسىنىڭ 76 ازاماتى بار. وتباسى مۇشەلەرىمەن قوسا ەسەپتەگەندە ولاردىڭ سانى – 161. سونىمەن قاتار شەتەلدىك ازاماتتاردىڭ شىعۋىنا بايلانىستى مىسىر جانە يزرايل تاراپىنان بەلگىلى تالاپتار بار. ولاردىڭ ۇشتەن ءبىرى ەۆاكۋاتسيالاۋعا كەلمەيدى. ولار كامەلەتكە تولعاندار، ەرلى-زايىپتىلار»، - دەدى مينيسترلىكتىڭ رەسمي وكىلى ايبەك سمادياروۆ مينيسترلىكتە وتكەن ءباسپاسوز ءماسليحاتىندا.

ەسكە سالساق، گازا سەكتورىنداعى پالەستينالىق راديكالدار يزرايل اۋماعىنا زىمىران اتقىلاپ، ءيزرايلدىڭ ورتالىعى مەن وڭتۇستىگىندە ەرەكشە جاعداي ەنگىزىلگەن  ەدى.

سوڭعى مالىمەتتەر بويىنشا، يزرايل اسكەرى گازانى تولىعىمەن قورشاپ، ەكىگە ءبولىپ تاستاعان.

Abai.kz