5 قازان كۇنى قازاقستاننىڭ 17 وبلىسىندا اۋدان اكىمدەرىنىڭ سايلاۋى ءوتتى. ورتالىق سايلاۋ كوميسسياسى اۋداندار مەن وبلىستىق ماڭىزى بار قالالار اكىمدەرىن سايلاۋ قورىتىندىسىن جاريالادى.

بۇل سايلاۋ مەملەكەت باسشىسىنىڭ باستاماسىمەن العاش رەت پيلوتتىق رەجيمدە اۋداندار مەن وبلىستىق ماڭىزى بار قالالاردا وتكىزىلدى. سايلاۋ بارىسىندا 1553 سايلاۋ كوميسسياسى جۇمىس ىستەپ وعان 17 وبلىستىق، 3 قالالىق، 42 اۋداندىق جانە 1491 ۋچاسكەلىك سايلاۋ كوميسسيالارى جۇمىلدىرىلعان.

بالاما نەگىزدە وتكەن سايلاۋ بيۋللەتەندەرىنە 125 كانديدات ەنگىزىلگەن. ال سايلاۋعا قاتىسۋ كورسەتكىشى – 62,79%-دى قۇرادى. سايلانعان اكىمدەردىڭ ورتاشا جاسى 46,7 جاستى قۇرايدى.

«سايلاۋ ناۋقانى رەسپۋبليكانىڭ سايلاۋ زاڭناماسى نورمالارىنىڭ تالاپتارىنا سايكەس ءوتتى. داۋىس بەرۋ كۇنى بايقاۋدى قازاقستان رەسپۋبليكاسىنىڭ 8500-گە جۋىق كانديداتتاردىڭ سەنىم بىلدىرىلگەن ادامدارى، بايقاۋشىلارى مەن باق وكىلدەرى جۇزەگە اسىردى»، دەلىنگەن وسك حابارلاماسىندا.

وسك قورىتىندىسى بويىنشا 17 وڭىردەگى سايلاۋ قورىتىندىلارى كەلەسىدەي:

اباي وبلىسىنىڭ كۋرچاتوۆ قالاسىنىڭ اكىمى وزگەرمەدى، ابدراليەۆ بولات تانسىقبايۇلى وز ورنىندا قالعان. ال اباي اۋدانىنىڭ اكىمى اۋىسىپ، مەيىرجان سماعۇلوۆ ەسىمدى 1987 جىلعى ازامات جاڭا اكىم بوپ سايلانعان.

اقمولا وبلىسىنىڭ اقكول، استراحان، ەسىل، جاقسى، شورتاندى اۋداندارىنىڭ اكىمدەرىنەن ۇشەۋى وزگەرگەن، ەكەۋى ورنىندا قالعان. اقكول اۋدانىنىڭ اكىمى اۋىسىپ، باسشىلىققا 1983 جىلى تۋعان ءابدىراحمانوۆ ءبىرجان تاسبولاتۇلى كەلگەن. ول بۇرىن اقكول اۋدانى اكىمىنىڭ ورىنباسارى بولعان. ال استراحان اۋدانىنا بۇلاندى اۋدانىنىڭ اكىمى بولعان ەرسەيىتوۆ تالعات امانبايۇلى كەلسە، ەسىل اۋدانىنا «بەيسەن-1» جشس ديرەكتورىنىڭ ورىنباسارى بالجانوۆ سەرىك مىرزاسەيىتۇلى سايلانعان. جاقسى مەن شورتاندى اكىمدەرى ورنىندا قالعان.

اقتوبە وبلىسى  قوبدا، ويىل، ىرعىز اۋداندارىندا ءبىر اكىم عانا وزگەرگەن. قوبدا اۋدانىنا قوبدا اۋدانى اكىمىنىڭ ورىنباسارى بولىپ قىزمەت ەتكەن تىنىمگەرەەۆ ىزگىلىك دوسمۇراتۇلى سايلانعان. ال ويىل مەن ىرعىز ءاۋداندارىنىى اكىمدەرى سايلاۋدا قايتا جەڭىسكە جەتىپ، ورنىن ساقتاپ قالعان.

الماتى وبلىسىندا ەكى اۋدان اكىمى سايلانعان. بالقاش اۋدانىنىڭ اكىمى بولىپ قۇتپانبەتوۆ ازات ۇكىتايۇلى سايلانعان. ول بۇرىن اكىمنىڭ ورىنباسارى بولعان. ال جامبىل اۋدانىنىڭ اكىمى ەرتاس نۇرلان قايتا سالىنعان.

اتىراۋ وبلىسى يساتاي اۋدانىنىڭ اكىمى وزگەرىپ، مۋسين نۇرىم بەكەجانۇلى اكىم بولعان. ال قىزىلقوعا اۋدانىنىڭ اكىمى كرەسلوسىن بوساتپاعان.

باتىس قازاقستان وبلىسى بوكەيورداسى، قاراتوبە اۋدانىنىڭ اكىمدەرى وزگرەمەگەن. ال تاسقالا اۋدانىنىڭ اكىمى بولىپ، بۇرىنعى اكىمنىڭ ورىنباسارى بولعان شاكيروۆ تالعات اسقارۇلى سايلانعان.

جامبىل وبلىسىندا جۋالى مەن ت.رىسقۇلوۆ اۋدانىنىڭ اكىمدەرى اۋىسپاعان.

جەتىسۋ وبلىسىنىڭ سارقان جانە كەربۇلاق اۋداندارىنىڭ اكىمى دە اۋىسپاعان.

قاراعاندى وبلىسىنىڭ وساكاروۆ، اقتوعاي اۋداندارىنىڭ اكىمى اۋىسپاعان. ال پريوزەرسك قالاسىنىڭ اكىمى بولىپ احمەتوۆ مانسۋر تالعاتۇلى سايلانعان.

قىزىلوردا وبلىسىنىڭ سىرداريا، شيەلى اۋداندارىنىڭ اكىمدەرى اۋىسپاعان.

قوستاناي وبلىسىنىڭ التىنسارين، قارابالىق، فەدوروۆ اۋدانى مەن رۋدنىي قالاسىنىڭ اكىمدەرى اۋىسپاعان. دەنيسوۆ اۋدانىنىڭ عانا اكىمى وزگەرگەن.

ماڭعىستاۋ وبلىسىندا بەينەۋ اۋدانىنڭ اكىمى بولىپ  شالباەۆ راحىمجان ىسقاقۇلى سايلانعان. بۇرىن بەينەۋ اۋدانى اكىمىنىڭ ورىنباسارى بولعان.

پاۆلودار وبلىسىنىڭ اقتوعاي، جەلەزين اۋداندارىنىڭ اكىمدەرى قالعان، شارباقتى اۋدانىنا اكىمنىڭ ورىنباسارى بولعان يمانكۋلوۆ سەرجان ەرعالىمۇلى جاڭادان سايلانعان.

سولتۇستىك قازاقستاننىڭ ەسىل جانە مامليۋت اۋداندارىنىڭ اكىمى بولىپ بۇرىنعى اكىمنىڭ ورىنباسارلارى كەلسە، تيمەريازەۆ اۋدانىنىڭ اكىمى وزگەرمەگەن.

تۇركىستان وبلىسى ماقتاارال مەن سوزاق اۋداندارىنىڭ اكىمى ورىندارىندا قالعان. ال بايدىبەك اۋدانىنان «كورپوراتسيا» ERNUR» جشس ديرەكتورى نۋرماحانوۆ ەرلان زايپوۆيچ سايلانسا، شاردارا اۋدانىنا اكىم بولىپ، شاردارا اۋداندىق ماسليحاتىنىڭ توراعاسى كارسىباەۆ ارمان رومانوۆيچ سايلانعان.

ۇلىتاۋ وبلىسى، ۇلىتاۋ اۋدانىنىڭ اكىمى دە وزگەرمەگەن.

شىعىس قازاقستان وبلىسىندا التاي اۋدانىنىڭ اكىمى جاڭادان سايلانسا، گلۋبوكوە اۋدانىنىڭ اكىمى اۋىسپاعان.

قورىتىندىلاساق، سايلاۋ بارىسىندا 42 اۋدان، 3 ماڭىزى بار قالانىڭ اكىمى سايلانعان. ونىڭ ىشىندە 29 اكىم ورنىندا قالسا، ءبىرشاماسىنا اكىمنىڭ ورىنباسارلارى اكىم بولىپ تاعايىندالعان.

Abai.kz