ۇكىمەت باسشىسىنىڭ ورىنباسارى سەرىك جۇمانعارين Bloomberg اگەنتتىگىنىڭ جازعان «قازاقستان – رەسەيدىڭ ارتىنداعى اۋلا» دەگەن تەزيسىن «اقىماقتىڭ ءسوزى» ەكەنىن ايتتى.

Bloomberg اگەنتتىگى فرانتسيا پرەزيدەنتى ەممانيۋەل ماكروننىڭ قازاقستانعا ساپارى جونىندە «ماكرون ۋران مەن جاڭا دوستارىن تابۋ ءۇشىن ءپۋتيننىڭ ارتقى اۋلاسىنا كەلدى» (Macron Lands in Putin’s Backyard Seeking New Friends and Uranium) ماقالاسىن جاريالاعان ەدى.

«قازاقستان ەشكىمنىڭ ارتقى اۋلاسى ەمەس، بۇل – تاۋەلسىز مەملەكەت، كوپ جىلدىق تاريحى بار ماڭگىلىك ەل. جاقىندا تۇركىستاندا ۇكىمەتارالىق كوميسسيا وتكىزىپ، رەسەيلىك ارىپتەستەرىمدى شاقىرعان ەدىم. وسىدان كەيىن قوجا احمەت ياسساۋي كەسەنەسىنە باردىق. ەكسكۋرسيا جەتەكشىسى اقسارايدا سول كەزدەگى حاننىڭ I پەتر ەلشىلەرىن قابىلداعانىن ايتىپ بەردى. سوندا رەسەيلىك ارىپتەستەرىم قازاقستان تاريحى تۋرالى ەشتەڭە بىلمەيتىنىن مويىندادى. ءبىز تۇركىستان مەن ماسكەۋ اراسىندا تىكەلەي رەيس اشۋعا ۋاعدالاستىق. كەرۋەن سارايداعى 8 D فورماتتاعى ۇشاتىن تەاتردى كورسەتتىك. مۇندا قانداي ارتقى اۋلا تۋرالى ءسوز بولۋى مۇمكىن؟ كىم كىمنىڭ اۋلاسى؟ ءبارى بوس اڭگىمە»، - دەپ جاۋاپ بەردى س.جۇمانعارين ءتىلشى سۇراعىنا.

سونىمەن بىرگە، ۆيتسە-پرەمەر قازاقستاننىڭ ەاەو-عا مۇشەلىگى جونىندە اڭگىمەلەدى. ەۋرازيا كەڭىستىگىندە كوپتەگەن ماسەلە شەشىلىپ جاتقانىن جەتكىزدى.

«Qazaq Air اۋە جەلىسى چەليابى مەن نوۆوسىبىرگە اشىلىپ جاتىر. مۇنىڭ بىزگە نە جاماندىعى بار؟ ءبىزدىڭ شيكىزاتىمىز باتىسقا جاڭا وتكىزۋ پۋنكتتەرى ارقىلى وتەدى دەپ كەلىستىك. ەندى رەسەي بالتىق پورتتارى ارقىلى ءبىزدىڭ كومىرگە جەڭىلدىكتەردى قاراستىرىپ جاتىر. قوسىمشا ءتورت وتكىزۋ پۋنكتىن اشۋعا جانە بولاشاقتا بارلىق شەكتەۋدى الىپ تاستاۋعا كەلىسىپ وتىر. كورىپ وتىرعانىڭىزداي، بۇل ءبىزدىڭ كۇندەلىكتى ساۋدا-ەكونوميكالىق قىزمەتىمىزدىڭ پراكتيكالىق ماسەلەلەرى. ءبىر ەلدەن ءبىر نارسەنى كوبىرەك ساتىپ الاتىنىمىز بىرەۋدىڭ «اۋلاسى» ەكەندىگىمىزدى بىلدىرمەيدى. بىزگە كەرەك بولعان سوڭ، ساتىپ الامىز. بۇل تۇرعىدا ەشكىم ءبىر قادام ارتقا شەگىنبەيدى. ءبىزدىڭ وكىلدەرىمىزدىڭ اراسىندا اۋلا دا، تومەن دەڭگەيلى ادامدار دا جوق»، - دەپ تۇيىندەدى س.جۇمانعارين.

فوتو: اشىق دەرەككوزدەن

Abai.kz