مەملەكەت باسشىسى قاسىم-جومارت توقاەۆ مەملەكەتتىك قىزمەتكەرلەردى، اسكەري قىزمەتكەرلەردى، پوليتسيا قىزمەتكەرلەرى مەن قۇتقارۋشىلاردى ويىن ورىندارىنا بارۋدان باس تارتۋدى مىندەتتەيتىن جارلىققا قول قويدى.

جاڭا قۇجات پرەزيدەنتتىڭ بۇرىنعى كەيبىر جارلىقتارىنا تولىقتىرۋلار ەنگىزدى.

"قازاقستان رەسپۋبليكاسى قارۋلى كۇشتەرىنىڭ، باسقا دا اسكەرلەرى مەن اسكەري قۇرالىمدارىنىڭ جالپىاسكەري جارعىلارىن بەكىتۋ تۋرالى" 2007 جىلعى 5 شىلدەدەگى № 364 جارلىقتا جاڭا تارماق ەنگىزىلدى: "اسكەري قىزمەتشى قىزمەتتىك مىندەتتەرىن اتقارۋمەن بايلانىستى جاعدايلاردى قوسپاعاندا، ويىن مەكەمەسىنە بارۋدان باس تارتۋى ءتيىس".

"مەملەكەتتىك قىزمەتشىلەردىڭ ادەپ نورمالارى مەن مىنەز-قۇلىق قاعيدالارىن ودان ءارى جەتىلدىرۋ جونىندەگى شارالار تۋرالى" 2015 جىلعى 29 جەلتوقسانداعى № 153 جارلىقتا مەملەكەتتىك قىزمەتشىلەردىڭ ادەپ كودەكسىندە: "قىزمەتتىك مىندەتتەرىن اتقارۋمەن بايلانىستى جاعدايلاردى قوسپاعاندا، ويىن مەكەمەسىنە بارۋدان باس تارتۋ" تارماعى قوسىلادى.

"قۇقىق قورعاۋ ورگاندارى، ازاماتتىق قورعاۋ ورگاندارى جانە مەملەكەتتىك فەلدەگەرلىك قىزمەت قىزمەتكەرلەرىنىڭ ادەپ كودەكسىن بەكىتۋ تۋرالى" 2023 جىلعى 2 قاڭتارداعى № 81 جارلىقتا قۇقىق قورعاۋ ورگاندارى، ازاماتتىق قورعاۋ ورگاندارى جانە مەملەكەتتىك فەلدەگەرلىك قىزمەت قىزمەتكەرلەرىنىڭ ادەپ كودەكسىندە سونداي-اق: "قىزمەتتىك مىندەتتەرىن اتقارۋمەن بايلانىستى جاعدايلاردى قوسپاعاندا، ويىن مەكەمەسىنە بارۋدان باس تارتۋ" تارماعى قوسىلادى.

قاۋلى العاشقى رەسمي جاريالانعان كۇنىنەن كەيىن 10 كۇنتىزبەلىك كۇن وتكەن سوڭ قولدانىسقا ەنگىزىلەدى.

Abai.kz