قازاقستاندا سۇيىتىلعان گاز تاپشى جانە بۇل ماسەلە جۋىق ارادا شەشىلمەيدى. سارسەنبى كۇنى جۋرناليستەردىڭ سۇراقتارىنا جاۋاپ بەرگەن ەنەرگەتيكا ءمينيسترى الماسادام ساتقاليەۆ وسىلاي دەپ مالىمدەدى.

"نارىقتا گاز ەداۋىر تاپشى. قازىر اۆتوجۇرگىزۋشىلەرگە: اتالعان وتىن ءتۇرى ەلدە تاپشى جانە بۇل ماسەلە جۋىق ارادا شەشىلمەيدى دەپ اشىق ايتۋعا ءماجبۇرمىز" دەدى ساتقاليەۆ. ونىڭ سوزىنەن Vlast كەلتىرەدى.

ءمينيستردىڭ ايتۋىنشا، كەيىنگى 9 ايدا گازدى تۇتىنۋ كولەمى 25 پايىزعا ارتقان، ياعني قازىر ايىنا 225-250 مىڭ توننا گاز تۇتىنادى. ەگەر بۇل تەندەنتسيا جالعاسا بەرسە جانە شارا قولدانىلماسا، گاز تاپشىلىعى ۋشىعادى.

ول ازاماتتارمەن تۇسىندىرمە جۇمىستارىنىڭ ماڭىزدىلىعىن اتاپ ءوتىپ، ەنەرگەتيكا مينيسترلىگىنىڭ اۆتوگاز باعاسىن ءوسىرۋ باستاماسى ۇكىمەت دەڭگەيىندە كەڭىنەن تالقىلانادى دەدى.

"مەملەكەتتىڭ الەۋمەتتىك وسال توپتاردى قولداۋ نورمالارىن قولدانۋعا مۇمكىندىگى بار. مەملەكەتتە ءوندىرىستى سۋبسيديالاۋ ارقىلى قولداۋ قۇرالى بار. ۇكىمەت كەز كەلگەن جاعدايدا تەڭگەرىمدى تۇردە ارەكەت ەتەدى" دەدى ول.

ءبىر اپتا بۇرىن، 1 قاراشادا ەنەرگەتيكا ءمينيسترى الماسادام ساتقاليەۆ سۇيىتىلعان گاز باعاسىنىڭ وسەتىنىن حابارلاعان. مينيستر "گاز باعاسى بىردەن ەمەس، ساتىلى تۇردە 110 تەڭگەگە دەيىن وسەدى" دەگەن. ساتقاليەۆتىڭ سوزىنشە، قازىر وتىن گازاسى ىشكى نارىققا ءوز باعاسىنان تومەن — 50-80 تەڭگە ارالاعىندا ساتىلىپ جاتىر.

قازاقستاندا بولشەك ساۋداداعى سۇيىتىلعان گازدىڭ شەكتىك مولشەرىن مەملەكەت رەتتەيدى.

ەنەرگەتيكا مينيسترلىگى قىركۇيەك ايىندا سۇيىتىلعان مۇناي گازىنىڭ شەكتىك باعاسىن انىقتاۋ ەرەجەسى بەكىتىلگەن ءمينيستردىڭ قاۋلى جوباسىن جاريالاعان. وعان سايكەس، ەندى سۇيىتىلعان گاز باعاسى جارتى جىل سايىن وزگەرىپ وتىرادى (بۇعان دەيىن جىلىنا ءبىر رەت وزگەرتىلگەن).

2022 جىلى قاڭتاردا جاڭاوزەندە جۇرت سۇيىتىلعان گاز باعاسىنىڭ قىمباتتاۋىنا قارسى نارازىلىق ءبىلدىرىپ، مۇنى قازاقستاننىڭ باسقا ايماعى دا قولداعان. سۇيىتىلعان گاز باعاسىنا قارسىلىق كەيىن باسقا دا الەۋمەتتىك تالاپتارعا ۇلاسقان. ارتىنشا نارازىلىق ەلدە تارتىپسىزدىككە ۇلاسىپ، قاڭتار وقيعاسى كەزىندە كەمى 238 ادام قازا تاپتى. كەيبىر ساراپشىلار "داعدارىسقا قارسى ءتيىمدى شارا قولدانا الماعان بيلىك نارازىلىقتىڭ ارتۋىنا جول اشىپ وتىر" دەپ ەسەپتەيدى.

Abai.kz