امەريكا پرەزيدەنتى بايدەن بۇدان شامالى ۋاقىت بۇرىن, قاراشا ايىندا قىتاي باسشىسىمەن كەزدەسەتىنىن مالىمدەگەن ەدى.

بۇگىن، سارسەنبى كۇنى سينگاپۋردا وتكەن ەكونوميكالىق فورۋمدا قىتايدىڭ ورىنباسار توراعاسى حانجىڭ بۇل اقپاراتتى راستاعانداي بولدى.

ول فورۋمدا سويلەگەن سوزىندە اقش-قىتاي قوس تارابىنىڭ ءتىل تابىسۋعا مۇددەلى بولىپ وتىرعانىن جەتكىزگەن. سوڭعى ايلاردا امەريكا مەملەكەت ىستەر حاتشىسىنىڭ، قارجى جانە ساۋدا مينيسترلەرىنىڭ بەيجىڭدە رەسمي ساپارلاي كەلگەنىن ءسوز ەتىپ، بۇل ەكى ەل باسشىسىنىڭ كەزدەسۋگە مۇددەلى ەكەنىن ايعاقتايتىن ناقتى سيگنال دەگەن.

ءسوزىنىڭ سوڭىندا: «جەر شارى ۇلكەن. اقش پەن قىتاي ەكى الىپ ەلدىڭ ورتاق دامىپ، ورتاق كوركەيۋىنە مۇمكىندىك بار»، - دەپ اياقتاعان.

امەريكا مەن قىتاي اراسىندا سوڭعى جىلدارى كەدەن سالىعى، كىسىلىك قۇقىق، مەملەكەت قاۋىپسىزدىگى سالالارىندا الاۋىزدىق تۋىلىپ، تۇرالاۋعا بەت العان ەدى. ترامپ باستاعان ساۋدا سوعىسىن بايدەن جالعاستىرىپ، قىتايعا جوعارى تەحنولوگيانى بەرۋگە تيىم سالىپ، چيپ سوعىسىن اشقان ەدى. قىتايدىڭ ۋكراينا سوعىسىندا رەسەيدى قولداۋى اراداعى ارازدىققا ماي قۇيعانداي اسەر ەتتى.

«بلۋمبەرگ» اقپارات كوزىنىڭ جازۋىنشا، اقش پەن قىتاي باسشىلارى الداعى كۇندەرى سان-فرانتسيسكودا وتەتىن ازيا-تىنىقمۇحيت ەلەرىنىڭ ەكونوميكالىق فورۋمىندا (APEK) كەزدەسەدى.

قىتاي توراعاسى اق ءۇي باسشىسىنان بولەك، امەريكانىڭ ەڭ بەدەلدى 200 كومپانياسىنىڭ باسشىلارىمەن سالتاناتتى قوناقاسى دا باس قوسپاق ەكەن.

Abai.kz