«AMANAT» پارتياسىنىڭ فراكتسيا مۇشەسى، دەپۋتات ق. بالابيەۆ جالعىزباستى انا جانە جالعىزباستى اكەلەردى الەۋمەتتىك قورعاۋ ماسەلەسىن پارلامەنت قابىرعاسىندا كوتەردى.

«مەملەكەت باسشىسى قاسىم-جومارت كەمەلۇلى توقاەۆ وتباسى ماسەلەسىنە ۇنەمى قولداۋ تانىتىپ، باسىمدىق بەرەتىندىگى بارشامىزعا بەلگىلى.

بۇگىنگى دەپۋتاتتىق ساۋال تولىق ەمەس وتباسىلار، جالعىزباستى انا جانە جالعىزباستى اكەلەردىڭ الەۋمەتتىك قورعالۋى تۋرالى. دەپۋتاتتىق ساۋالدىڭ تولىق ءماتىنى قوسىمشا جولدانادى.

«AMANAT» پارتياسى تولىق ەمەس وتباسىلاردىڭ، اسىراۋشىسىنان ايىرىلعان وتباسىلاردىڭ جانە جالعىزباستى انالاردىڭ، جالعىزباستى اكەلەردىڭ الەۋمەتتىك جاعدايىن قولداۋ، ول وتباسىلارىنداعى بالالاردىڭ قالىپتاسىپ، دامۋى تۋرالى جۇيەلى شارالاردى جۇزەگە اسىرۋعا بايلانىستى كەلەسى ۇسىنىستاردى ەنگىزەدى.

قازاقستانداعى بارلىق ايەل مەن جالعىزباستى اكەلەرگە بالا كۇتىمىنە بايلانىستى تولەنەتىن جاردەماقى مەرزىمىن 3 جىلعا دەيىن ۇزارتۋدى ۇسىنامىز.

جۇمىسسىز جالعىزباستى انالار جانە جالعىزباستى اكەلەردىڭ بالا كۇتىمىنە بايلانىستى اي سايىنعى الەۋمەتتىك تولەم مولشەرىن زاڭدا بەكىتىلگەن كۇنكورىس مينيمۋمىنا تەڭەستىرۋدى سۇرايمىز.

جالعىزباستى انالار جانە جالعىزباستى اكەلەردىڭ بالالارىنا مەملەكەتتىك بالاباقشادان ورىن الۋ ءۇشىن كەزەكتە باسىمدىق بەرۋدى، مەكتەپتەردە سپورت سەكتسيالارىنا جانە شىعارماشىلىق ۇيرمەلەرگە تەگىن قاتىسۋىن قامتاماسىز ەتۋدى، ەڭبەك نارىعىنداعى سۇرانىسقا يە ماماندىقتارعا كاسىبي باعدار جۇمىسىنىڭ باعدارلاماسىن قابىلداپ، گرانت نەگىزىندە ءبىلىم الىپ، ەڭبەككە ارالاسۋىن قاراستىراتىن باعدارلاما قابىلداۋدى سۇرايمىز»،-دەدى دەپۋتات.

Abai.kz