پاۆلودار وبلىستىق پوليتسيا دەپارتامەنتىنىڭ بۇرىنعى باستىعى نۇرلان ءماسىموۆ وزىنە شىعارىلعان ۇكىممەن كەلىسپەيدى. بۇگىندە ونىڭ ءىسى، دالىرەك ايتقاندا اپەللياتسيا سوتتا قايتا قارالۋدا. ءۇش اي بۇرىن پاۆلودار سوتى ەكس-پوليتسەيدى 10 جىلعا باس بوستاندىعىنان ايىردى. ال  ونىڭ ورىنباسارى، بۇرىنعى پولكوۆنيك دامير سيرازيديموۆ 8 جىلعا، كاسىپكەر ەۆگەني ەۆكوۆيچ 7 جىلعا سوتتالدى، دەپ حابارلايدى Ulysmedia.

وتىرىس ۇزاققا سوزىلعان جوق. سۋديا مارات رىمباەۆ قاتىسۋشىلاردىڭ تىزىمىمەن تانىستى – سوتتالۋشىلار پروتسەسكە تەرگەۋ يزولياتورىنان بەينەبايلانىس ارقىلى قاتىستى.

نۇرلان ءماسىموۆ ەكى ءوتىنىش بەردى. ول سوت وتىرىستارىن تىركەۋدىڭ اۋديو جانە بەينە ماتەريالدارىمەن تانىسۋعا ۋاقىت بەرۋدى جانە سوت زالىنا بارىپ، تىكەلەي قاتىسۋعا مۇمكىندىك بەرۋدى سۇرادى. باسقا سوتتالۋشىلار دا بايلانىس ساپاسىنا قاناعاتتانبادى.

- بىزدە اۋديو-بەينە بايلانىس بار. مەنىڭ ويىمشا، سوتتالۋشىلاردى سوت زالىنا جەتكىزۋگە ەشقانداي نەگىز جوق، - دەدى پروكۋرور ماگومەد دۋباەۆ.

ونى سۋديالار قولداپ، وتىرىستى ونلاين فورماتتا قالدىردى. الايدا قورعانىس تاراپى بۇل شەشىممەن كەلىسپەدى.

- ءبىرىنشى ساتىداعى بۇكىل پروتسەسس وفلاين ءوتتى، بۇل ەشكىمگە كەدەرگى كەلتىرمەدى. جەتى اي بويى ءبىز سوتتا وففلاين رەجيمىندە وتىردىق، ال بۇل جولى قانداي دا ءبىر سەبەپتەرمەن سوتتالۋشىنى سوتقا شاقىرۋدا قيىندىقتار تۋىپ وتىر. سوت سوتتالۋشىعا ارنالعان، ونسىز وتىرىس وتكىزۋدىڭ ءمانى جوق. ماسەلە سۋديالاردا دا، بىزدە دە ەمەس – سوتتالۋشىدا. ءىستىڭ ءبارى سونىڭ توڭىرەگىندە، بىراق پروتسەسكە ونى شاقىرعىلارىڭىز كەلمەيدى – دەدى ادۆوكات دميتري كۋرياچەنكو نارازىلىق ءبىلدىرىپ.

- سوتتىڭ زاڭ بۇزعانىن كورسەتىپ، كاسساتسياعا شاعىم بەرۋ عانا قالىپ وتىر. ءبىز سوت قۇرامىنا سەنىمسىزدىك بىلدىرە الامىز - بۇل قۇرالداردىڭ ءبىرى، سوتتا تىڭداۋ قۇقىعىن قالپىنا كەلتىرۋ مۇمكىندىگى. مەنىڭ ويىمشا، كەلەسى وتىرىستا بۇل ءوتىنىش قايتادان جاريالانادى جانە ەگەر ول قابىلدانباسا، ءبىز بۇل قۇقىقتى پايدالانامىز دەپ ويلايمىن، - دەدى قورعاۋشى.

سوت القاسى كەلەسى وتىرىستى 23 قاراشاعا بەلگىلەدى.

ەستەرىڭىزگە سالايىق، نۇرلان ءماسىموۆ – كارىم ءماسىموۆتىڭ نەمەرە ءىنىسى. ك.ءماسىموۆ ۇقك-ءنى باسقارىپ تۇرعان كەزدە ن.ءماسىموۆ الماتى وبلىستىق پوليتسيا دەپارتامەنتىندە، ءىىم-دە، جاۋاپتى قىزمەتتەر اقتاردى. سوڭعى لاۋازىمى – پاۆلودار وبلىسى پوليتسيا دەپارتامەنتىنىڭ باستىعى.

بىلتىر 17 قاڭتاردا نۇرلان ءماسىموۆ قىزمەتىنەن بوساتىلدى. سول جىلى ماۋسىمدا وعان ىزدەۋ جاريالاندى. نۇرلان ءماسىموۆ تۋرالى اقپارات بەرگەن ادامعا 12 ملن تەڭگەگە دەيىن سىياقى بەرىلەتىنى حابارلاندى.

2022 جىلى 13 شىلدەدە قر ۇلتىق قاۋىپسىزدىك كوميتەتىنىڭ وكىلدەرى نۇرلان ءماسىموۆتى رەسەيمەن شەكارادا ۇستادى.

نۇرلان ءماسىموۆ پەن ونىڭ بۇرىنعى ورىنباسارى دامير سيرازيديموۆكە 366-باپتىڭ 4-بولىگى ("اسا ءىرى كولەمدە پارا الۋ") جانە 189-بابى ("اسا ءىرى مولشەردە سەنىپ تاپسىرىلعان شەتەلدىك مۇلىكتى يەمدەنۋ نەمەسە جىمقىرۋ") بويىنشا ايىپ تاعىلعان. كاسىپكەر ەۆگەني ەۆكوۆيچكە 28-باپتىڭ 5-بولىگى – 189-بابىنىڭ 4-بولىگىنىڭ 2-تارماعى ("ەرەكشە ءىرى مولشەردە پارا بەرۋگە كومەكتەسۋ") بويىنشا ايىپتالسا، ماسىموۆكە سونىمەن قوسا 92-باپ – "قازاقستان رەسپۋبليكاسىنىڭ مەملەكەتتىك شەكاراسىن قاساقانا زاڭسىز كەسىپ ءوتۋ" ايىبى ارتىلعان.

ايىپتاۋشى تاراپتىڭ مالىمەتىنشە، پوليتسيا دەپارتامەنتىنىڭ باسشىسى ءوزىنىڭ ورىنباسارىمەن بىرلەسىپ 90,3 ميلليون تەڭگە كولەمىندە مۇلىك تۇرىندە پارا العان.

2020 جىلدىڭ قىركۇيەگىندە قازاقستان رەسپۋبليكاسىنىڭ ىشكى ىستەر مينيسترلىگى ارتيللەريالىق تەحنيكانى ساتىپ الۋعا كونكۋرس جاريالاعان كەزدە پاۆلودار وبلىسىنىڭ پوليتسيا باسشىلىعى وعان ولاردىڭ دوسى ەۆكوۆيچ مىندەتتى تۇردە قاتىسۋى كەرەك دەپ ەسەپتەيدى.

ال كوپ ۇزاماي كاسىپكەرمەن پاۆلودارلىق ءتارتىپ ساقشىلارىنىڭ اراسىندا 607,5 ملن تەڭگەگە ساۋىت، قالقان، امورتيزاتور، رەزەڭكە تاياقتاردى ساتىپ الۋعا كەلىسىم-شارت جاسالادى.

ايىپتاۋشى تاراپتىڭ اقپارتىنا سۇيەنسەك، شارت جوعارى باعامەن جاسالعان، ويتكەنى ءىس جۇزىندە كاسىپكەر بارلىق ارنايى تەحنيكانى ساتىپ الۋعا 184 ملن جۇمساعان. ياعني، مەملەكەت قارجىسىنان 423 ملن تەڭگە ۇرلانعان.

بيىلعى جىلدىڭ تامىزىندا  سوت ۇكىمىمەن پاۆلودار وبلىسى پوليتسيا دەپارتامەنتىنىڭ بۇرىنعى باستىعى مۇلكىنىڭ تاركىلەنۋىمەن 10 جىلعا سوتتالدى.

Abai.kz