رەسەي تاراپىنىڭ قاتىسۋىمەن قازاقستاندا 3 جىلۋ ەلەكتر ورتالىعى سالىنادى. بۇل تۋرالى قوستانايدا ءوتىپ جاتقان قازاقستان مەن رەسەيدىڭ XIX وڭىرارالىق ىنتىماقتاستىق فورۋمىندا پرەمەر-ءمينيستردىڭ ورىنباسارى سەرىك جۇمانعارين ايتتى، دەپ حابارلايدى Kazinform.

«ەكىجاقتى قارىم-قاتىناستى ودان ارى دامىتۋ باعىتتارىن تالقىلاۋ ماقساتىندا وسى جىلدىڭ 31 قازانىندا ۇكىمەتارالىق كوميسسيا وتىرىسىن وتكىزدىك. بىرقاتار ماسەلە قاراستىرىلدى. ماسەلەن، رەسەيدەن اعاش ماتەريالدارىن جەتكىزۋ. جىلدىڭ سوڭىنا دەيىن ەلىمىزگە كەسىلگەن اعاشتاردى جەتكىزۋ ءۇشىن قازاقستان-رەسەي شەكاراسىندا قوسىمشا تەمىر جول وتكىزۋ پۋنكتتەرىن اشۋ مامەلەسى پىسىقتالادى»، - دەدى ول.

سونىمەن قاتار، ۆيتسە-پرەمەر قازاقستاننىڭ تەمىر كەنى شيكىزاتىنىڭ اي سايىن تاسىمالدانۋىن قامتاماسىز ەتۋ مۇمكىندىگى دە قاراستىرىلاتىندىعىن ايتتى.

«رەسەي تاراپى قازاقستاندا 3 جىل ەلەكتر ورتالىعى جوباسىن جۇزەگە اسىرۋعا قاتىسادى. ءتيىستى قۇجاتقا بۇگىن قول قويامىز. ەلدەر اراسىنداعى اۋە بايلانىسىن دا كەڭەيتەمىز. اتاپ ايتقاندا، ءنوۆوسىبىر مەن چەليابىگە QAZAQ AIR اۋە رەيستەرىنىڭ سانىن ارتتىرۋدى كەلىسەمىز»، - دەدى سەرىك جۇمانعارين.

فوتو: اشىق دەرەككوزدەن

Abai.kz