ەكى جاق قول قويعان كەلىسىمگە سايكەس، قىتاي جانە قازاقستان ازاماتتارى كورشى ەلدە شەكارادان وتكەن كۇننەن باستاپ 30 كۇنگە دەيىن ۆيزاسىز بولا الادى. جالپى 180 كۇن ىشىندە ۆيزاسىز 90 كۇننەن ارتىق جۇرە المايدى.

وسى ۋاقىتقا دەيىن قىتاي ازاماتتارى قازاقستاندا ۆيزاسىز 14 كۇنگە دەيىن جۇرە العان، ەندى ونىڭ مەرزىمى ۇزارىپ وتىر.

"2023 جىلعى 10 قاراشادا قازاقستان ۇكىمەتى مەن قىتاي ۇكىمەتى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىم كۇشىنە ەندى. وسى كەلىسىمنىڭ 1-ءشى بابىنا سايكەس، ەكى ەلدىڭ ازاماتتارى جەكە ىستەردى، ءتۋريزمدى، ەم قابىلداۋدى، حالىقارالىق تاسىمالداردى، ترانزيتتىك، سونىمەن بىرگە ىسكەرلىك ماقساتتاردى جۇزەگە اسىرۋ ءۇشىن ۆيزالىق تالاپتاردان بوساتىلادى. وسى رەتتە ازاماتتاردىڭ ەكى مەملەكەت اۋماعىندا بولۋ مەرزىمى كۇنتىزبەلىك 30 (وتىز) كۇننەن اسپايتىن مەرزىمدەگى كەزەڭگە، ال كۇنتىزبەلىك 180 ء(جۇز سەكسەن) كۇن ىشىندە جيىنتىعىندا كۇنتىزبەلىك 90 (توقسان) كۇننەن اسپاۋى قاجەت" دەپ جازىلعان قازاقستان ءسىم-ءنىڭ حابارلاماسىندا.

ۆەدومستۆونىڭ ايتۋىنشا، بۇل كەلىسىم گونكونگ جانە ماكاو ارنايى اكىمشىلىك اۋداندارىنا قولدانىلمايدى.

"قازاقستان ازاماتتارى گونكونگقا ۆيزاسىز 14 (ون ءتورت) كۇننەن اسپايتىن مەرزىمگە بارا الادى، ال ماكاوعا بارۋ ءۇشىن ۆيزا راسىمدەۋ قاجەت" دەپ جازىلعان حابارلامادا.

رەسمي مالىمەت بويىنشا، قازاقستاندىقتار 34 ەلگە ۆيزاسىز بارا الادى.

Abai.kz