ادىلەت مينيسترلىگىندە وتكەن ۆەدومستۆوارالىق كوميسسيا وتىرىسىندا ايەل قۇقىعىن بۇزعانداردىڭ ارەكەتىن كريمينالداندىرۋ ماسەلەسى كوتەرىلدى، دەپ حابارلايدى Ulysmedia.kz.

ءماجىلىس دەپۋتاتى اسحات ايماعامبەتوۆتىڭ ايتۋىنشا، ەلىمىزدە ايەلدىڭ دەنساۋلىعىنا بىرنەشە رەت زيان كەلتىرىپ، بىرنەشە رەت قول كوتەرۋ ارەكەتتەرىن كريمينالداندىرۋ ۇسىنىلىپ وتىر. زاڭناماعا ءتيىستى وزگەرىستەر ازىرلەنىپ تە قويعان. الايدا دەپۋتات قوعامدا بۇل ماسەلەگە قاتىستى پىكىر قايشىلىعى بارىن ايتادى.

«پىكىرتالاس ءالى ءجۇرىپ جاتىر. ۇستانىمدار وتە كوپ. كەيبىر پروفەسسورلار ءبىر ۇستانىمدا بولسا، ىشكى ىستەر مينيسترلىگىنىڭ ءوز ۇستانىمى بار. ءبىز جۇيەلى تۇردە نەمەسە بىرنەشە رەت ايەل قۇقىعىن بۇزعانداردىڭ ارەكەتىن كريمينالداندىرۋدى ۇسىنىپ وتىرمىز»، - دەدى اسحات ايماعامبەتوۆ.

ونىڭ سوزىنشە، زاڭناماعا ۇسىنىلىپ وتىرعان وزگەرىستەردىڭ قاتارىندا ءۇيبۇزارلاردى وتباسىنان ارنايى ورتالىققا وقشاۋلاۋ شاراسى دا بار.

«تۇرمىستىق كيكىلجىڭنەن كەيىن ايەلدى بالاسىمەن وقشاۋلاپ جاتادى. ال كۇش كورسەتۋشى ۇيدە قالادى. الاڭسىز ءومىر سۇرە بەرەدى. ايەل پانا ىزدەۋگە ءماجبۇر. سوندىقتان دەپۋتاتتار كۇش كورسەتۋشىنى ۇيدەن وقشاۋلاۋدى ۇسىنىپ وتىر»، - دەدى دەپۋتات.

ايتا كەتەيىك، ەلىمىزدە 1 شىلدەدەن باستاپ ەلدە تۇرمىستىق زورلىق-زومبىلىق ءۇشىن جاۋاپكەرشىلىك كۇشەيتىلدى. سودان بەرى قۇقىق قورعاۋ ورگاندارىنا وسىنداي فاكتىلەر بويىنشا 27 مىڭ ءوتىنىش كەلىپ تۇسكەن، ونىڭ 8%-ى ەسەپتەن شىعارىلعان. سوت شەشىمى بويىنشا 6 مىڭ قۇقىق بۇزۋشى قاماۋعا الىنسا، سوتتا 13 مىڭ وتباسى تاتۋلاسقان.

جۋىردا دەپۋتات امانتاي جارقىنبەك تۇرمىستىق جانجال تۋسا، ەرىمەن بىرگە ايەلىن دە قاماۋعا الۋ كەرەگىن مالىمدەگەن.

«مىنانى ءتۇسىنۋىمىز كەرەك: ءبىزدىڭ ەلىمىز، ءبىزدىڭ جەرىمىز وتە ۇلكەن اۋماقتى قامتيدى. بىزدە وڭتۇستىك پەن سولتۇستىكتىڭ، شىعىس پەن باتىستىڭ مەنتاليتەتى ءبىر-بىرىنە ۇقساي بەرمەيدى. وسى وڭىرلەردىڭ جاستارى ءبىر-بىرىمەن وتباسى قۇرادى. ءارتۇرلى تىلدە سويلەپ، ءارتۇرلى ۇستانىمدا بولادى. ولار وتباسى بولىپ قالىپتاسقانشا، ۇرىس-كەرىس تە ورىن الادى. ىدىس-اياق سىلدىرلاماي تۇرمايدى. ءار ىدىس-اياق سىنعان سايىن كۇيەۋىن اپارىپ قاماپ تاستايتىن بولساق، كوپشىلىگى قايتادان وتباسى بولا الماي، قوسىلماي كەتەدى»، - دەدى ول.

ماجىلىسمەننىڭ وسى پىكىرىنەن كەيىن Human Rights Watch حالىقارالىق قۇقىق قورعاۋ ۇيىمى قازاقستاندا تۇرمىستىق زورلىق-زومبىلىقتىڭ الدىن الۋ ءۇشىن جەتكىلىكتى كۇش-جىگەر قابىلدانباعانى، ال دەپۋتاتتارعا ايەلدەردى جازالاۋ تۋرالى ويلارىن ايتۋعا مۇمكىندىك بەرىلگەنى ءۇشىن ەل بيلىگىن سىنعا الدى.

Abai.kz