12 قاراشادا پاريجدە مىڭداعان ادام انتيسەميتيزمگە قارسى مارشتا ءجۇرىپ ءوتتى. وعان ەلدىڭ پرەمەر-ءمينيسترى ەليزابەت بورن، ەكس-پرەزيدەنتتەرى نيكوليا ساركوزي مەن فرانسۋا وللاند قاتىستى.

فرانتسيا پرەزيدەنتى ەممانۋەل ماكرون ميتينگكە قاتىسپادى. سەنبى كۇنگى مالىمدەمەسىندە ول فرانتسۋز حالقىن انتيسەميتيزمنىڭ ورالۋىن ايىپتاۋعا شاقىردى.

قاۋىپسىزدىكتى قامتاماسىز ەتۋ ءۇشىن پاريج كوشەلەرىندە 3000 پوليتسيا قىزمەتكەرى ءجۇردى.

7 قازاندا گازادا يزرايل مەن حاماس راديكال توبى اراسىندا قاقتىعىس باستالعالى بەرى فرانتسيادا ەۆرەيلەرگە قارسى 1247 اكتى بولعان ەكەن. بۇل بىلتىرعى جىلمەن سالىستىرعاندا ءۇش ەسەگە كوپ دەلىنگەن پوليتسيا مالىمدەمەسىندە.

ءبىر كۇن بۇرىن فرانتسۋزدىڭ پاريج جانە مارسەل سەكىلدى قالالارىندا گازا سەكتورىنداعى سوعىستى توقتاتۋدى تالاپ ەتكەن مارش وتكەن. ولاردىڭ دەنى پالەستينا تۋىن كوتەرىپ شىعىپ، گازانى بومبالاۋدى توقتاتۋدى تالاپ ەتكەن.

سەنبى كۇنى پالەستينالىقتاردى قولداۋ اكتسيالارىنىڭ ەڭ ءىرىسى لوندوندا ءوتتى. ول جاقتا پوليتسيانىڭ مالىمەتىنشە، شاراعا 300 مىڭداي ادام قاتىسقان. شامامەن 150 راديكال نارازى ۇستالعان.

حاماس باقىلاۋعا العان دەنساۋلىق ساقتاۋ مينيسترلىگىنىڭ مالىمەتىنشە، 7 قازاننان بەرى گازا سەكتورىندا 11 مىڭ ادام قازا تاپقان. ولاردىڭ 4500 — بالالار.

Abai.kz