باس پروكۋرور بەرىك اسىلوۆ پرەزيدەنت قاسىم-جومارت توقاەۆقا ەلىمىزدەگى زاڭدىلىق پەن قۇقىقتىق ءتارتىپتىڭ جاي-كۇيى، سونداي-اق قاداعالاۋشى ورگاننىڭ قىزمەتىندەگى باسىم باعىتتار جونىندە مالىمەت بەردى.

اسىلوۆتىڭ ايتۋىنشا، ەلىمىزدە كاسىپكەرلەردى قىلمىستىق قۋدالاۋ 3 ەسە قىسقارعان (614-تەن 204-كە دەيىن), 1041 تۇلعانىڭ نەگىزسىز قىلمىستىق قۋدالاۋعا تارتىلۋىنا جول بەرىلگەن جوق. كونستيتۋتسيالىق قۇقىق بۇزۋشىلىقتار سانى 29 پايىزعا قىسقاردى (310-نان 222-گە دەيىن).  

بۇدان بولەك، پرەزيدەنتكە ازاپتاۋعا قارسى ءىس-قيمىل شارالارى جونىندە باياندالدى. مۇنداي ارەكەتتەردىڭ الدىن الۋ ءۇشىن 54 تۇزەتۋ مەكەمەسىندە 29 مىڭ بەينەكامەرا ورناتىلعان، سايكەسىنشە ازاپتاۋ فاكتىلەرىنە شاعىمدانۋ دا 94-تەن 17-گە دەيىن ازايعان.

سونداي-اق باس پروكۋرور قوعامدا رەزونانس تۋدىرعان قىلمىستاردىڭ تەرگەلۋ بارىسى جونىندە ەسەپ بەردى. اتالعان ماسەلەلەرمەن قاتار، حالىقارالىق ىنتىماقتاستىق باعىتىندا اتقارىلعان جۇمىستاردىڭ ناتيجەسى تانىستىرىلدى. اتاپ ايتقاندا، بيىل شەتەلدەن اۋىر جانە اسا اۋىر قىلمىس جاسادى دەپ ايىپ تاعىلعان 40 ادام ەكستراديتسيالاندى. جالپى قازاقستان قىلمىستىق-قۇقىقتىق سالا بويىنشا الىس شەتەلدىڭ 34 مەملەكەتىمەن 74 شارتقا قول قويدى.

كەزدەسۋ سوڭىندا قاسىم-جومارت توقاەۆ ەلىمىزدىڭ تىنىس-تىرشىلىگىنە قاتىستى بارلىق سالادا زاڭنىڭ ساقتالۋىن قامتاماسىز ەتۋ ءىسىن كۇشەيتۋ قاجەت ەكەنىنە نازار اۋداردى.

Abai.kz