قازاقستان ەكونوميكاسىنىڭ كولىك ونەركىسىبى سالاسى، ەڭ قيىن سالالاردىڭ ءبىرى، وزىمىزدە جاسالعان اۆتو ءوندىرىسىن جولعا قويامىز دەپ قانشاما قاراجات تالان تاراج بولدى.

وعان دالەل رەتىندە 4 پايىزدىق اۆتو نەسيە، كۇيرەگەن ازيااۆتو جوباسى، بيپەك اۆتو قاشىپ كەتكەن بالۋشكين. كەزىندە Deo كومپانياسىنىڭ وزبەكستانعا دەيىن ەلىمىزدە اۆتو ءوندىرىس سالاسىن تولىق مودەرنيزاتسيالايمىز دەپ ينۆەستيتسيا قۇيۋعا كەلگەنىن دە ايتپاسا بولمايدى.

ءبىزدىڭ شەندىلەردىڭ پارا سۇراعانىنا بولا، ءبىز سەندەردە تولىق ءوندىرىس تسيكلىن قويايىق دەپ تۇرمىز، سىزدەر بولساڭىزدار تاعى اقشا سۇرايسىزدار دەپ، كورشى ەلگە بارىپ، ول جاقتاعى اۆتو ءوندىرىستى تولىق مودەرنيزاتسيادان وتكىزگەنى دە بۇل سالانىڭ قازاقستان ءۇشىن ساباعى مول بولدى دەپ ويلايمىن.

ەندى كورەيالىق KIA كومپانياسى قوستانايدا تولىق تسيكلدى زاۋىت سالاتىنى ايتىلىپ جاتىر. زاۋىت 2025 جىلى ىسكە قوسىلىپ، 1500 جوعارى اقىلى جۇمىس ورنى اشىلادى. جىلىنا 70 مىڭ كولىك شىعارىلادى دەگەن مالىمەتتەر ايتىلۋدا. وسى سانداردى ەسىمىزدە ساقتاپ الۋىمىز قاجەت دەپ ەسەپتەيمىن.

ەگەر جوبا ناتيجەلى جۇزەگە اسسا اۆتوكولىكتەردى رەسەي نارىعىنا شىعارۋدى كوزدەپ وتىرعان كورىنەدى. تەك ىشكى نارىققا ەمەس، كورشى ەلگە وتكىزۋدى كوزدەگەندەرى دۇرىس دەپ ەسەپتەيمىن. ودان ەكسپورتتىق الەۋەتىمىز ارتادى، تەڭگەمىزدىڭ تۇراقتىلىعىنا دا ىقپال ەتەدى. جوباعا سەرىكتەس بولىپ وتىرعان Allur كومپانياسى قازىردىڭ وزىندە ءبىراز ءونىمىن كورشى ەلگە ەكسپورتتايدى ەكەن.

ەگەر جوعارىداعى مالىمەتتەر راس بولىپ، جۇمىس ورنىندارى اشىلىپ جاتسا، ەلىمىزدە اۆتو ءوندىرىسىنىڭ تولىق تسيكلى قويىلسا، وندا بۇل سالا مودەرنيزاتسيادان ءوتتى دەۋگە بولادى. ءارى ەل ەكونوميكاسىنا وڭ اسەر ەتەتىنى ءسوزسىز. قوستاناي وڭىرىندە مۇنداي جوبالاردىڭ باستالىپ جاتقانى ارينە قۋانتادى.

بىراق بۇل بۇعان دەيىنگى ءساتسىز جوبالاردىڭ ءبىرى بولىپ جاتسا، ەرتەڭ مەملەكەتتىك بيۋدجەتتەن 4 پايىزدىق اۆتو نەسيە سياقتى اتالعان زاۋىتتىڭ ونىمدەرىن قولداۋ كەرەك دەپ حالىق جيناعان قاراجاتتى اۋدارۋ ستسەناريى ءجۇرىپ جاتسا. وندا حالىق بولىپ، ازاماتتىق قوعام بولىپ ونداي ارەكەتتەرگە جول بەرمەۋىمىز قاجەت دەپ ەسەپتەيمىن.

ماقسات حالىق

Abai.kz