پوليتسيا "تەرگەۋ جالعاسىپ جاتىر، تەرگەۋ مۇددەسىنە بايلانىستى وزگە اقپارات جاريالانبايدى" دەدى. 13 قاراشادا پوليتسيا "قىلمىستى حابارلاماۋ" جانە "قاۋىپتى جاعدايدا قالدىرۋ" باپتارى بويىنشا قىلمىستىق ءىس قوزعاعانىن حابارلادى.
بۇرىنعى ۇلتتىق ەكونوميكا ءمينيسترى قۋاندىق بيشىمباەۆ 11 قاراشادا استانا سوتىنىڭ شەشىمىمەن "ادام ءولتىرۋ" بابىمەن ەكى ايعا قامالعان. بيشىمباەۆ ايەلى سالتانات نۇكەنوۆانى ءولتىردى دەگەن كۇدىككە ىلىنگەن. 31 جاستاعى ايەل استاناداعى مەيرامحانالاردىڭ بىرىندە قاتىگەزدىكپەن ۇرىپ-سوعۋدان كوز جۇمعان.
قۋاندىق بيشىمباەۆ 2018 جىلى جەمقورلىق بابىمەن 10 جىلعا سوتتالعان ەدى. قىزىلورداداعى اينەك زاۋىتىنا بولىنگەن اقشانىڭ ءبىر ميلليارد تەڭگەسىن جىمقىردى دەپ ايىپتالعان. 2019 جىلى قازاندا بيشىمباەۆتى شارتتى جازامەن تۇرمەدەن بوساتقان.
ەكس-مينيستر قۋاندىق بيشىمباەۆ ايەلىنىڭ قازاسىنان سوڭ الەۋمەتتىك جەلىدە زورلىق-زومبىلىققا قارسى "زاڭدى وزگەرت، جازانى قاتاڭدات" دەگەن ۇرانمەن فلەشموب باستالدى. جەلى قولدانۋشىلارى ۇكىمەتتەن تۇرمىستاعى زورلىق-زومبىلىققا قارسى شارالاردى، زاڭدى قاتاڭداتۋدى، جازانى كۇشەيتۋدى، وتباسىنداعى زورلىققا قىلمىستىق ستاتۋس بەرۋدى، الەۋمەتتىك قىزمەتتەردىڭ قولداۋ كورسەتۋىن قامتاماسىز ەتۋدى تالاپ ەتىپ، بيلىكتى تەز ارادا شارا قابىلداۋعا شاقىردى.
Abai.kz
