پرەزيدەنت ىشكى ىستەر ءمينيسترى ەرجان سادەنوۆپەن، باس پروكۋرور بەرىك اسىلوۆپەن، جوعارعى سوت توراعاسى اسلامبەك مەرعاليەۆپەن، سونداي-اق باسقا دا سالالىق ۆەدومستۆولاردىڭ باسشىلارىمەن كەزدەسىپ، كونسۋلتاتسيالار وتكىزدى، دەپ حابارلايدى اقوردا.

مەملەكەت باسشىسى زاڭنىڭ ساقتالۋىنا، ازاماتتاردىڭ قۇقىقتىق ساناسى مەن قۇقىقتىق مادەنيەتىنىڭ دەڭگەيىن ارتتىرۋعا قاتىستى ماسەلەلەرگە باسا ءمان بەردى.

قاسىم-جومارت توقاەۆتىڭ پىكىرىنشە، زاڭ مەن ءتارتىپ قاعيداتى قازاقستان قوعامىنىڭ يدەولوگيالىق جانە ساياسي تەمىرقازىعىنا اينالۋعا ءتيىس. قازىرگى قالىپتاسقان جاعداي كوشەدەگى مادەنيەتسىزدىكتەن باستاپ توبەلەس، ۇرلىق، كىسى ولتىرۋگە دەيىنگى قۇقىقبۇزۋشىلىقتىڭ بارلىق تۇرىنە ىمىراسىز قارسى تۇرۋدى تالاپ ەتەدى.

پرەزيدەنت وسىنداي كەلەڭسىزدىكتەرمەن تۇتاس قوعام بولىپ كۇرەسۋ كەرەك دەپ سانايدى. ەلىمىزدە تۇرمىستىق زورلىق-زومبىلىق، ۆانداليزم، دورەكىلىك جانە بۇزاقىلىق سياقتى زاڭ مەن ءتارتىپ بۇزۋشىلىقتىڭ كەز كەلگەن تۇرىنە مۇلدە توزبەيتىن ءارى ونى قاتاڭ ايىپتايتىن جاعداي قالىپتاستىرۋ قاجەت. ايەلدەر مەن بالالارعا زورلىق-زومبىلىق كورسەتۋ فاكتىلەرىنىڭ باتىل تۇردە جولىن كەسۋ كەرەك.

قاسىم-جومارت توقاەۆ ىشكى ىستەر مينيسترلىگىنە ەلوردا مەيرامحانالارىنىڭ بىرىندە بولعان كىسى ولىمىنە قاتىستى رەزونانس تۋدىرعان وقيعانى ەرەكشە باقىلاۋعا الۋدى تاپسىردى.

– زاڭ بارىنە بىردەي. ازاماتتارىمىز زاڭدىلىقتى نىعايتۋ جولىندا جۇدىرىقتاي جۇمىلسا عانا قوعامدا ادىلدىك ورنايدى. ادىلەتتى قازاقستان – زاڭ مەن ءتارتىپ ۇستەمدىك قۇراتىن ەل، – دەدى پرەزيدەنت.

ەستەرىڭىزگە سالا كەتەيىك، مەملەكەت باسشىسى رەسپۋبليكا كۇنى قارساڭىندا وتكەن جيىندا سويلەگەن سوزىندە ادىلەتتى قازاقستاندى قۇرۋ ءۇشىن قۇقىقتىق مادەنيەتتى دامىتۋ قاجەت دەگەن بولاتىن.

«زاڭسىزدىق، تارتىپسىزدىك، مادەنيەتسىزدىك ەلدى جارعا جىعادى. مۇنداي جاعىمسىز ۇردىسكە بۇكىل قوعام بولىپ قارسى تۇرۋىمىز كەرەك. ال تارتىپكە باعىنعان قوعام وركەنيەتتى بولادى. بۇل – زاڭدىلىق. ءار ازامات ەلىمىزدىڭ زاڭىن قۇرمەتتەسە، بەرەكە-بىرلىك تە، باقۋاتتى تۇرمىس تا بولادى»، – دەدى قاسىم-جومارت توقاەۆ.

پرەزيدەنت كەزدەسۋلەر مەن كونسۋلتاتسيالار بارىسىندا قوعامدا ادىلدىك پەن ءتارتىپ ورناتۋ ءۇشىن قۇقىق قورعاۋ ورگاندارى مەن سوت ينستانتسيالارى قىزمەتكەرلەرىنە ايرىقشا جاۋاپكەرشىلىك جۇكتەلەتىنىن اتاپ ءوتتى.

Abai.kz