قازاقستان سىرتقى ىستەر مينيسترلىگى گازا سەكتورىنان "رافاح" باقىلاۋ-وتكىزۋ پۋنكتى ارقىلى ەگيپەت اۋماعىنا 92 قازاقستان ازاماتى جانە ولاردىڭ وتباسى مۇشەلەرى وتكەنىن حابارلادى.

"قازاقستاندىق ديپلوماتتار وتانداستارىمىزعا بارلىق قاجەتتى كونسۋلدىق-قۇقىقتىق جانە پسيحولوگيالىق كومەك كورسەتتى. شەكاراداعى راسىمدەردەن كەيىن ءبىزدىڭ ازاماتتارىمىز كولوننا قۇرامىندا جولعا شىقتى جانە جاقىن ارادا كاير قالاسىنا جەتەدى" دەپ جازىلعان مينيسترلىك حابارلاماسىندا.

ۆەدومستۆو "رافاح" بەكەتى ارقىلى قازاقستان ازاماتتارىن ەۆاكۋاتسيالاۋدىڭ ءبىرىنشى كەزەڭى جۇزەگە اسىرىلىپ جاتقانىن، قازاقستاندىقتاردى سەكتوردان شىعارۋ ارى قاراي جالعاساتىنىن ايتتى.

بۇعان دەيىن قازاقستان سىرتقى ىستەر مينيسترلىگى گازا سەكتورىندا 76 قازاقستاندىق (وتباسى مۇشەلەرىمەن قوسقاندا 161 ادام) قالعانىن مالىمدەگەن. ۆەدومستۆو سول كەزدە ەگيپەت ارقىلى شىعۋعا شەكتەۋلەر بارىن جانە حاماس راديكال توبى (اقش پەن ەو "تەرروريستىك ۇيىم" دەپ تانىعان) رۇقسات ەتپەگەنىن العا تارتقان.

وتكەن اپتادا مينيسترلىك گازا سەكتورىندا قالعان قازاقستاندىقتاردى ەۆاكۋاتسيالاۋ ءۇشىن يزرايل جانە ەگيپەت بيلىگىمەن سويلەسكەنىن حابارلاعان.

23 قازاندا قازاقستان ءسىم گازا سەكتورىنداعى اتىستا قازاقستاننىڭ ءبىر ازاماتى جانە ونىڭ 23 جاستاعى قىزى (پالەستينا ازاماتى) قازا تاپقانىن حابارلاعان. 11 قازاندا تەل-اۆيۆتەن ارنايى رەيسپەن الماتىعا 166 ادام (ونىڭ 124-ءى – قازاقستان ازاماتى) كەلگەن.

7 قازاندا "حاماس" راديكال توبى يزرايلگە شابۋىل جاساپ، 200-دەن استام ادامدى كەپىلدىككە العان. بۇعان جاۋاپ رەتىندە يزرايل ارمياسى گازا سەكتورىندا ءىرى اسكەري وپەراتسيا باستاعان. سودان بەرى ەكى جاقتا مىڭداعان ادام كوز جۇمعان.

قازاقستان "بۇل قاقتىعىستى بەيبىت كەلىسسوزدەرمەن جانە ديپلوماتيالىق ديالوگتارمەن شەشۋدى" ۇسىنىپ كەلەدى.

Abai.kz