بۇگىن ءماجىلىستىڭ جالپى وتىرىسىندا دەپۋتاتتار قوعامدىق بىرلەستىكتەر ماسەلەلەرى تۋرالى زاڭدى ەكىنشى وقىلىمدا قابىلدادى. بۇل تاقىرىپ بويىنشا ءماجىلىس دەپۋتاتى نارتاي سارسەنعاليەۆ بايانداما جاسادى.

دەپۋتاتتىڭ ايتۋىنشا، جالپى زاڭ جوبا ءۇش قۇرىلتايشىمەن قوعامدىق بىرلەستىك  قۇرۋعا مۇمكىندىك بەرەدى.

سونىمەن قاتار مەملەكەت باسشىسىنىڭ جولداۋىن ورىنداۋ ءۇشىن ۇكىمەت زاڭ جوباسىنا ەڭبەك جاعدايلارى زياندى جۇمىستارمەن بايلانىستى ادامداردى الەۋمەتتىك قورعاۋعا باعىتتالعان بىرقاتار تۇزەتۋ ەنگىزۋدى ۇسىنعان. وسىعان ساي دەپۋتاتتار الەۋمەتتىك كودەكسكە ارنايى الەۋمەتتىك تولەم ەنگىزۋ جونىندەگى نورمالار ەنگىزدى.

– بۇل تولەم قىزمەتكەر 55 جاسقا تولعان بولسا، كەمىندە 84 اي مىندەتتى كاسىپتىك زەينەتاقى جارنالارى تولەنگەن بولسا جانە ازامات  زياندى جۇمىستارداعى قىزمەتىن توقتاتقان كەزدە جۇزەگە اسادى، – دەدى ن.سارسەنعاليەۆ.

دەپۋتات اتاپ وتكەندەي، زياندى جۇمىستا ىستەيتىن ازامات مىندەتتى زەينەتاقى جارنالارى ەسەبىنەن زەينەتاقى جيناقتارىن 55 جاستا الا ما، الدە 63 جاستا الا ما ءوز بەتىنشە انىقتاۋعا قۇقىلى.

– ەڭبەك جاعدايلارى زياندى جۇمىستارمەن بايلانىستى ازامات ارنايى الەۋمەتتىك تولەم الىپ زياندى جۇمىستان كەتەمىن دەي مە، الدە ءارى قاراي قىزمەت ەتە بەرەمىن دەي مە ءوزى شەشەدى. ارنايى الەۋمەتتىك تولەم زەينەتكەرلىك جاسقا تولعانعا دەيىن جۇرگىزىلەدى، – دەدى ن.سارسەنعاليەۆ.

بۇعان قوسا، ازاماتتى قىزمەتتىك مىندەتتەرىن ورىنداۋ كەزىندەگى جازاتايىم وقيعالاردان قورعاۋ ءۇشىن، مىندەتتى ساقتاندىرۋ جۇيەسىن جەتىلدىرۋ جونىندەگى نورمالار ۇسىنىلدى.

– ادام دەنساۋلىعىنا زيانى بار ءوندىرىستى جۇزەگە اسىراتىن كومپانيا ساقتاندىرۋ كومپانياسىنا بەلگىلى ءبىر مولشەردە تولەم جاسايدى. ساقتاندىرۋ كومپانياسى سول قارجىنىڭ 6 پايىزىن جۇمىس بەرۋشىگە قايتارۋعا ءتيىس. ول قاراجات قىزمەتكەرلەردىڭ ەڭبەك جاعدايىن جاقسارتۋعا جۇمسالادى. ساقتاندىرۋ ۇيىمدارى ەڭبەك جاعدايىندا زارداپ شەككەن قىزمەتكەردىڭ شيپاجايداعى ەمىن تولەۋگە ءتيىس. ول 100 اەك-تەن اسپاۋى كەرەك، – دەدى دەپۋتات.

نارتاي سارسەنعاليەۆتىڭ پىكىرىنشە، بۇل زاڭدا قابىلدانعان نورمالار ەڭبەك جاعدايلارى زياندى جۇمىستارمەن بايلانىستى ازاماتتاردى الەۋمەتتىك قولداۋعا باعىتتالعان باستامالاردىڭ باسى عانا. بۇل جۇمىس ءارى قاراي دا جالعاسا بەرەدى.

Abai.kz