اسكەري قىزمەتتىڭ جاڭا ءتۇرى – رەزەرۆتەگى قىزمەت ەلىمىزدە 2025 جىلى پايدا بولۋى مۇمكىن. ءتيىستى زاڭ جوباسى بۇگىن ءماجىلىستىڭ جالپى وتىرىسىندا ءبىرىنشى وقىلىمدا ماقۇلداندى.

قورعانىس مينيسترلىگى ازىرلەگەن زاڭ جوباسىندا اسكەري قىزمەتتىڭ جاڭا ءتۇرى – رەزەرۆتەگى قىزمەتتى ەنگىزۋ ۇسىنىلدى.

بۇل تۇرعىلىقتى جەرى بويىنشا كەلىسىم-شارت نەگىزىندەگى اسكەري قىزمەتتىڭ ەرىكتى ءتۇرى.

– رەزەرۆتەگى قىزمەت ارقىلى قازاقستان ءوز ارمياسىن ءوز ەركىمەن قىزمەت ەتۋگە نيەت بىلدىرگەن ازاماتتار قاتارىنان جاساقتاۋدىڭ قوسىمشا تاسىلىنە يە بولادى. ءبىز قوسىمشا اسكەري رەزەرۆشىلەردى دايىن اسكەري قۇرالىمدارعا جالدايمىز، دابىل بويىنشا ولار دايارلىقتان وتكەن اسكەري بولىمگە كەلىپ، دەرەۋ جاۋىنگەرلىك مىندەتتەرگە كىرىسە الادى، – دەدى وسى زاڭ جوباسى بويىنشا جۇمىس توبىنىڭ جەتەكشىسى ەرمۇرات باپي.

جوبا قازاقستان رەسپۋبليكاسىنىڭ كامەلەتكە تولعان ازاماتتارىنا قاتىستى بولادى.  قىزمەتكە قابىلداۋ ەرىكتى تۇردە جۇزەگە اسىرىلادى.

ىرىكتەۋ كەزەڭدەرىنەن وتكەن ازاماتتارمەن قورعانىس مينيسترلىگى 3 جىلعا كەلىسىم-شارت جاساسادى. سونىڭ نەگىزىندە ولار اي سايىن بولىمدەردە قىسقا مەرزىمدى وقۋدان جانە ۆەدومستۆونىڭ بۇيرىعى بويىنشا 30 كۇندىك جيىنداردان وتەدى.

رەزەرۆشىلەرگە دەنساۋلىق جاعدايى بويىنشا تالاپتار قويىلادى جانە جاس شەكتەۋلەرى بەلگىلەنەدى: وفيتسەرلەر ءۇشىن – 60 جاسقا دەيىن، سەرجانتتار مەن ساربازدار ءۇشىن – 18-دەن 50 جاسقا دەيىن.

بۇگىنگى تاڭدا زاڭ جوباسىنا سايكەس، ولار مەرزىمدى قىزمەتتەن نەمەسە قىسقا مەرزىمدى اسكەري دايىندىق كۋرستارىنان وتكەن، جوعارى وقۋ ورىندارى جانىنداعى اسكەري كافەدرالاردا وقىعان ادامدار بولادى دەپ قاراستىرىلۋدا.

رەزەرۆشىلەر اسكەري بولىمدەردە دايىندىقتى جۇزەگە اسىرادى، ولارعا قارۋ-جاراق پەن جاۋىنگەرلىك تەحنيكا بەكىتىلەدى. ولار تەك ءوز وبلىسىنىڭ اۋماعىندا قىزمەت ەتەدى.

Abai.kz