ەلوردادا سپورت بەلسەندىلەرى قازاقستاننىڭ جانكۇيەرلەر وداعى بولىپ بىرىگۋ تۋرالى شەشىم قابىلدادى، دەپ حابارلايدى استانا اكىمدىگىنىڭ رەسمي سايتى.

ۇيىمنىڭ باستى ماقساتى – ەلىمىزدىڭ ۇلتتىق قۇراماسىن قولداۋ. بۇگىن، 17 قاراشادا فۋتبولدان ەۋروپا-2024 چەمپيوناتىنىڭ ىرىكتەۋ كەزەڭىنىڭ ماتچىنا جينالعان سپورت سۇيەر قاۋىم قازاقستان جانكۇيەرلەر وداعى بولىپ بىرىگۋ تۋرالى شەشىم قابىلدادى. ولار – سپورتشىلار، ەرىكتىلەر، ەلوردانىڭ بەلسەندى تۇرعىندارى، قوعامدىق ۇيىمداردىڭ وكىلدەرى.

«قازىر فۋتبولدان ۇلتتىق قۇرامامىزعا وتانداستارىمىزدىڭ قولداۋى قاجەت. يدەيا كوپتەن بەرى بار بولاتىن. ءبىز سپورتتىق ءىس-شارالارداعى مادەنيەتتىڭ ساقتالۋىن قولدايمىز. سول سياقتى فۋتبول عانا ەمەس، سپورتتىڭ كەز كەلگەن ءتۇرى بويىنشا بىرىككىمىز كەلەدى.
سونداي-اق، جانكۇيەرلەر كودەكسىن قابىلداۋ جوسپارلانىپ وتىر، وندا ستاديوندارداعى ءتارتىپتىڭ نەگىزگى نورمالارى مەن ەتيكاسى جازىلادى. ماتچ وتكىزىلەتىن ورىندار جۇرتشىلىق ءۇشىن قاۋىپسىز بولۋى ءتيىس»، - دەدى قازاقستاننىڭ جانكۇيەرلەر وداعىن قۇرۋدىڭ باس باستاماشىسى ءازيز ورازباەۆ.

ەستەرىڭىزگە سالا كەتەيىك، استانادا فۋتبولدان -2024 چەمپيوناتىنىڭ ىرىكتەۋ كەزەڭىنىڭ ماتچى ءوتىپ جاتىر، وندا قازاقستان قۇراماسى سان-مارينو كومانداسىن قابىلدايدى.

Abai.kz