كاتاردىڭ ارااعايىندىق ەتۋىمەن يزرايل قاتىسقان كەلىسسوزدە اقش جانە حاماس (ەو مەن اقش-تا تەرروريستىك ۇيىم دەپ تانىلعان) اراسىندا گازادا سوعىستى بەس كۇنگە توقتاتۋ جانە كەپىلدىكتە وتىرعان 200-دەن استام ادامنىڭ كەمىندە 50-ءىن بوساتۋ تۋرالى الدىن الا كەلىسىم جاسالدى.

بۇل جونىندە كەلىسىمنىڭ شارتتارىنان حابارى بار دەرەككوزگە سۇيەنگەن Washington Post باسىلىمى جازدى. التى بەتتەن تۇراتىن كەلىسىمدە كەپىلدىكتە وتىرعان ادامدار 24 ساعات سايىن شاعىن توپ بولىپ بوساتىلىپ وتىراتىنى جازىلعان.

الايدا اقش ۇلتتىق قاۋىپسىزدىك كەڭەسى ازىرگە تۇپكىلىكتى كەلىسىم قابىلدانباعانىن حابارلادى. يزرايل بيلىگى كەلىسىم جاسالعانىن جوققا شىعارادى. بۇعان دەيىن يزرايل كەلىسىمنىڭ الدىڭعى نۇسقاسىنان باس تارتقانى، ولار 50-دەن كوپ ادامدى بوساتۋدى تالاپ ەتكەنى حابارلانعان. حاماس جالپى 240 ادامدى كەپىلدىكتە ۇستاپ وتىر.

اقپارات قۇرالدارىنىڭ جازۋىنشا، بينيامين نەتانياحۋدىڭ كابينەتىنە ءيزرايلدىڭ وزىندە جانە اقش تارابىنان دا قىسىم ارتقان. جۋىردا يزرايلدە كەپىلدىكتە وتىرعان ادامداردىڭ تۋىستارى ءىرى ميتينگ ۇيىمداستىرعان.

يزرايل اسكەرى گازا سەكتورىندا حاماس-قا قارسى وپەراتسياسىن جالعاستىرىپ جاتىر. قازىر شايقاس سەكتوردىڭ سولتۇستىگىندە ءجۇرىپ جاتىر. پالەستينالىقتاردىڭ ايتۋىنشا، 7 قازاننان بەرى 12 مىڭنان استام بەيبىت تۇرعىن قازا بولعان، ازىرگە بۇل دەرەك تولىق راستالعان جوق. سەكتوردا ىستەپ جاتقان بۇۇ وكىلدەرى دە كوپ ادامنىڭ قازا بولعانىن، اراسىندا بالالار ەكەنىن ايتادى.

جۋىردا بۇۇ-نىڭ گۋمانيتارلىق جاعدايعا باعا بەرۋ توبى يزرايل اسكەرى باقىلاۋعا العان گازا سەكتورىنداعى ء"ال-شيفا" اۋرۋحاناسىنا بارعان. دۇنيەجۇزىلىك دەنساۋلىق ساقتاۋ ۇيىمىنىڭ سايتىنداعى اقپاراتقا قاراعاندا، توپ مۇشەلەرى جاعدايدى "جانكەشتىلىك" دەپ سيپاتتاپ، اۋرۋحانانىڭ ءوزىن ء"ولىم ايماعى" دەپ اتاعان.

مەديتسينالىق مەكەمە شەكتەلگەن رەجيمدە ىستەپ جاتىر، وندا 25 مەديتسينا قىزمەتكەرى قالعان، 291 ناۋقاس ەمدەلىپ جاتىر، 32 نارەستەنىڭ جاعدايى وتە اۋىر. ناۋقاستاردىڭ كوبى اسكەري قيمىلدار مەن بومبالاۋدان زارداپ شەككەن. كەيىنگى كۇندەرى بىرنەشە ادامعا ءتيىستى كومەك بەرىلمەگەندىكتەن قايتىس بولعان.

مەديتسينا قىزمەتكەرلەرى مەن ناۋقاستاردىڭ باسىم بولىگى سەنبى كۇنى تاڭەرتەڭ گازا سەكتورىنىڭ وڭتۇستىگىنە قونىس اۋدارعان.

يزرايل جاعى دارىگەرلەر مەن ناۋقاستارعا اۋرۋحانادان كەتۋ تۋرالى بۇيرىق بەرگەنىن جوققا شىعارىپ، مەكەمەنىڭ باسشىلىعى ەۆاكۋاتسيالاۋعا كومەكتەسۋىن سۇراعانىن ايتتى. ددسۇ-نىڭ حابارلاۋىنشا، قالعان ناۋقاستاردى ەۆاكۋاتسيالاۋ جوسپارى ازىرلەنىپ جاتىر.

يزرايل اسكەرىنىڭ حابارلاۋىنشا، حاماس اۋرۋحانا اۋماعىن ءوزىنىڭ بازاسى رەتىندە پايدالانعان. اۋرۋحانا اۋماعىندا قارۋ-جاراق قويماسى مەن جەراستى توننەلدەرگە جول تابىلعانى حابارلاندى. بۇۇ-نىڭ حابارلاماسىندا ول جونىندە ايتىلمايدى.

دەرەككوز:centralasian

Abai.kz