بۇرىنعى ءماجىلىس دەپۋتاتى نۇرجان التاەۆ 10 جىلعا سوتتالدى، دەپ حابارلايدى Ulysmedia.kz.

استانا سوتتارىنىڭ حابارلاۋىنشا، سوت سىبايلاس جەمقورلىق بويىنشا كۇدىكتى ەكس-ۆيتسە-مينيسترگە قاتىستى ۇكىم شىعارعان.

– استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى اسا ءىرى مولشەردە پارا الۋ فاكتىسى بويىنشا ەكس-ۆيتسە-مينيستر ا.-عا قاتىستى ۇكىم شىعاردى (قك 366-بابىنىڭ 4-بولىگى). سوت نە بەلگىلەدى: ەكس-ۆيتسە-مينيستر 2018 جىلدىڭ اقپانىنان 2020 جىلدىڭ شىلدەسىنە دەيىن «اتامەكەن» ۇكپ مۇددەلەرى ءۇشىن ءتيىمدى رەسمي شەشىم قابىلداۋعا ىقپالداسىپ، دەلدال ارقىلى م.-دان جالپى سوماسى 115 مىڭ اقش دوللارى جانە 8 ملن.150 مىڭ تەڭگە اقشانى پارا رەتىندە الدى. سوتتالۋشىنىڭ كىناسى كۋاگەرلەردىڭ ايعاقتارىمەن، ۇيالى تەلەفونداعى حات-حابارلارمەن، جاسىرىن تەرگەۋ ارەكەتتەرىنىڭ جازبالارىمەن، ساراپتاما اكتىلەرىمەن، زاتتاي دالەلدەمەلەرمەن جانە ت.ب. دالەلدەندى، – دەلىنگەن حابارلامادا.

سوتتا پروكۋرور ايىپتاۋدى قولداپ، 12 جىل مەرزىمگە باس بوستاندىعىنان ايىرۋ جازاسىن تاعايىنداۋدى سۇراعان. سوتتالۋشى سوتتان ءوزىن اقتاۋدى وتىنگەن.

سوت شەشىم شىعارعاندا قىلمىستىق جاۋاپتىلىق پەن جازانى جەڭىلدەتەتىن ءمان-جاي رەتىندە جاس بالالارىنىڭ بولۋىن تانىعانىمەن، قابىلداعان انتىن بۇزۋى اۋىرلاتاتىن ءمان-جاي رەتىندە قاراستىرعان.

– سوت ۇكىمىمەن ەكس-ۆيتسە-مينيستر ا. قك-ءنىڭ 366-بابىنىڭ 4-بولىگىندە كوزدەلگەن قىلمىستىق قۇقىق بۇزۋشىلىق جاساعانى ءۇشىن كىنالى دەپ تانىلىپ، ءومىر بويى مەملەكەتتىك قىزمەتتە قىزمەت اتقارۋ قۇقىعىنان ايىرىلا وتىرىپ، 10 جىل مەرزىمگە باس بوستاندىعىنان ايىرىلدى. ۇكىم زاڭدى كۇشىنە ەنگەن جوق، – دەپ حابارلايدى استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى.

ەسكە سالا كەتەيىك، 31 قازاندا استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ەكس-ماجىلىسمەن، تىركەلمەگەن «ەل تىرەگى» پارتياسىنىڭ جەتەكشىسى نۇرجان التاەۆتىڭ ءىسى بويىنشا الدىن الا تىڭداۋ وتكەن بولاتىن. پروكۋرور ەكس-ماجىلىسمەن نۇرجان التاەۆتىڭ ءىسىن جابىق رەجيمدە وتكىزۋدى سۇراعان. سوت ونىڭ ءوتىنىشىن قاناعاتتاندىرعان ەدى.

پروكۋرور ەكس-ماجىلىسمەن نۇرجان التاەۆقا قانداي ايىپ تاعىلىپ وتىرعانىن ايتتى. ونىڭ سوزىنشە، ەكس-ماجىلىسمەن ەڭبەك جانە حالىقتى الەۋمەتتىك قورعاۋ ۆيتسە-ءمينيسترى بولىپ تۇرعان كەزدە “2018-2020 جىلدار ارالىعىندا دەلدالدار ارقىلى 50 ملن تەڭگەدەن ارتىق پارا العان”. قىلمىستىق ءىس قىلمىستىق كودەكستىڭ 366-بابى 4-بولىگى بويىنشا قوزعالعان. سوتتا نۇرجان التاەۆ وزىنە تاعىلعان ايىپتى «ساندىراق» دەپ اتاعان بولاتىن.

Abai.kz