ءبىر اپتا بۇرىن اشتىق جاريالاعان ءجۋرناليستىڭ جاعدايىنىڭ ناشارلاپ كەتكەنىن ادۆوكاتى اينارا ايدارحانوۆا حابارلادى، دەپ جازادى Ulysmedia.kz.

«ايگەرىمگە كىرىپ شىقتىم. ارىپ-اشىپ، جۇرگەن كەزىندە تەڭسەلىپ كەتەدى! اشتىقتىڭ قانشا دەگەنمەن 8-ءشى كۇنى»، - دەيدى ادۆوكات.

ول سونىمەن قاتار، بەلسەندىنىڭ ءوزىن قولداعان جاقتاستارىنا ارناعان حاتىن جاريالادى.

ايگەرىم تىلەۋجاننىڭ قامىن ويلاعان وقىرماندار الەۋمەتتىك جەلىدە ونى اشتىقتى توقتاتۋعا شاقىرىپ، پىكىر قالدىرىپ جاتىر.

ايگەرىم تىلەۋجاننىڭ 5-6 كەلى سالماق جوعالتقانى حابارلانادى. ادۆوكاتى پروكۋراتۋراعا ارىز جولداماق.

11 شىلدەدە بەلسەندى ايگەرىم تىلەۋجانوۆا ءتورت جىلعا باس بوستاندىعىنان ايىرىلعان بولاتىن،. بەلسەندى قالاس نۇرپەيىسوۆ 8 جىلعا سوتتالىپ كەتتى. نۇرلان داليباەۆقا دا 8 جىل باس بوستاندىعىنان ايىرۋ جازاسى بەرىلدى. ەرمۇحامەت شىلىباەۆ پەن جانايدار كارمەنوۆ تا سەگىز جىلعا باس بوستاندىعىنان ايىرىلدى.

شىلدە ايىنىڭ باسىندا ايگەرىم تىلەۋجانوۆا باس پروكۋرور بەرىك اسىلوۆتى كىناسىزدىك پرەزۋمپتسياسىن بۇزعانى ءۇشىن سوتقا بەرگەن ەدى. 2023 جىلدىڭ 5 قاڭتارىندا ءماجىلىستىڭ جالپى وتىرىسىندا اسىلوۆ دەپۋتاتتاردىڭ قاڭتار وقيعالارى تۋرالى سۇراعىنا جاۋاپ بەرە وتىرىپ، تىلەۋجانوۆا مەن بەلسەندى نۇرپەيىسوۆتى سوت ۇكىمى شىقپاي تۇرىپ، ء"دىني ەكسترەميستەر", سونداي-اق "جاپپاي تارتىپسىزدىكتەردى ۇيىمداستىرۋشىلار" دەپ اتاعان ەدى.

الايدا باس پروكۋراتۋرا مۇنى كىناسىزدىك پرەزۋمپتسياسىن بۇزۋ دەپ ەسەپتەمەدى. سوت اسىلوۆ جاعىنا شىعىپ، ءجۋرناليستىڭ تالابىن تولىق كولەمدە قاناعاتتاندىرۋدان باس تارتتى.

2022 جىلدىڭ باسىندا قازاقستاندا جاڭاوزەندە گاز باعاسىنىڭ كوتەرىلۋىنە بايلانىستى نارازىلىق باستالىپ، مۇنىڭ ارتى ءىرى قالالارداعى ميتينگتەرگە، ارتىنشا تارتىپسىزدىكتەرگە ۇلاستى. ولاردى باسۋ ءۇشىن پرەزيدەنت قاسىم-جومارت توقاەۆ ۇقشۇ ەلدەرىنىڭ قارۋلى كۇشتەرىن شاقىردى. قازاقستان بيلىگى تارتىپسىزدىكتەر ءۇشىن "تەرروريستەردى" ايىپتادى. قاڭتار وقيعالارى كەزىندە 238 ادام قۇربان بولدى.

فوتو: اشىق دەرەككوزدەن

Abai.kz