بۇگىن ءماجىلىستىڭ جالپى وتىرىسىندا دەپۋتاتتار تۇرعىن ءۇي ساياساتىن رەفورمالاۋ ماسەلەلەرى تۋرالى زاڭ جوباسىن ءبىرىنشى وقىلىمدا ماقۇلدادى. بۇل تاقىرىپ بويىنشا ءماجىلىس دەپۋتاتى ۇلىقبەك تۇماشينوۆ بايانداما جاسادى.

زاڭ جوباسى مەملەكەت باسشىسىنىڭ ازاماتتار ءۇشىن تۇرعىن ۇيگە قولجەتىمدىلىكتى قامتاماسىز ەتۋ تۋرالى تاپسىرماسىنا سايكەس ازىرلەندى. دەپۋتاتتىڭ ايتۋىنشا، زاڭ جوباسىندا حالىقتىڭ الەۋمەتتىك وسال توپتارىنا جانە اسكەري قىزمەتكەرلەرگە دە ەرەكشە نازار اۋدارىلعان.

زاڭ جوباسىندا اكىمدىكتەردىڭ جاڭا فۋنكتسياسى ەنگىزىلگەنىن اتاپ وتكەن ءجون. ول ءبىر جىل ىشىندە اسكەري قىزمەتتى اتقارۋ، قۇقىقتىق ءتارتىپتى قورعاۋ كەزىندە، سونداي-اق ادام ءومىرىن قۇتقارۋ كەزىندە قازا تاپقان ادامداردىڭ وتباسىن تۇرعىن ۇيمەن قامتاماسىز ەتۋگە قاتىستى، – دەدى دەپۋتات.

جۇمىس بارىسىندا دەپۋتاتتار مەملەكەتتىك تۇرعىن ءۇي قورىنان تۇرعىن ءۇي الۋعا قۇقىعى بار ادامدار ساناتتارىنىڭ تىزبەسىن كەڭەيتتى. بۇل – مۇمكىندىگى شەۋتەۋلى بالاسى بار وتباسىلار جانە 1 جانە 2-توپتاعى مۇگەدەكتىگى بار ادامدار.

تاعى ءبىر ماڭىزدى جاڭالىق – حالىقتىڭ الەۋمەتتىك وسال توپتارىنا ساتىپ الۋ قۇقىعىنسىز جالعا بەرىلەتىن تۇرعىن ءۇيدى جەكەشەلەندىرۋگە مۇمكىندىك بەرۋ بولىپ وتىر. بۇدان بولەك، اپاتتى جاعدايداعى تۇرعىن ءۇيدىڭ ورنىنا بەرىلگەن باسپانانى جەكەشەلەندىرۋ قۇقىعى تۋرالى نورما ەنگىزىلدى.

سونىمەن قاتار ۇلىقبەك تۇماشينوۆ زاڭ جوبا اياسىندا وتباسى بانكى ۇلتتىق ينستيتۋتى رەتىندە ازاماتتاردى ەسەپكە قويۋ مەن تۇرعىن ۇيلەردى ءبولۋ جونىندەگى فۋنكتسيالارى ەنگىزىلگەنىن اتاپ ءوتتى.

بۇگىنگى تاڭدا بۇكىل ەلىمىزدە باسپاناعا مۇقتاج 647 مىڭعا جۋىق ادام تۇرعىن ءۇي كەزەگىندە تۇر. زاڭ جوباسىندا تۇرعىن ءۇيدى ورتالىقتاندىرىلعان ەسەپكە الۋدى جانە ءبولۋدى جۇزەگە اسىراتىن تولىققاندى «وتباسى بانك» دامۋ ينستيتۋتىن قۇرۋ ۇسىنىلادى. بۇل وكىلەتتىكتەر «وتباسى بانككە» جەرگىلىكتى اتقارۋشى ورگانداردان بەرىلەدى، – دەدى دەپۋتات.

دەپۋتاتتار زاڭ جوباسىمەن جۇمىستى ەكىنشى وقىلىمعا دەيىن جالعاستىراتىن بولادى.

Abai.kz