مەملەكەت باسشىسى باكۋگە جۇمىس ساپارى بارىسىندا ازەربايجان پرەزيدەنتىمەن كەزدەستى.

قاسىم-جومارت توقاەۆ ءداستۇرلى قوناقجايلىعى مەن بۇۇ-نىڭ ورتالىق ازيا ەلدەرى ەكونوميكالارىنا ارنالعان ارنايى باعدارلاماسىنىڭ (سپەكا) العاشقى ءسامميتىن ۇيىمداستىرعانى ءۇشىن يلحام اليەۆكە العىس ايتا وتىرىپ، باكۋدى «كاسپي ءوڭىرىنىڭ ءىنجۋ-مارجانى»، الەمدەگى ەڭ ادەمى قالالاردىڭ ءبىرى دەپ اتادى.

مەملەكەت باسشىسى ورايلى ءساتتى پايدالانىپ، يلحام اليەۆ پەن باۋىرلاس ازەربايجان حالقىن حالىقارالىق قۇقىق جانە بۇۇ قاۋىپسىزدىك كەڭەسىنىڭ قارارلارىنا ساي ەلدىڭ اۋماقتىق تۇتاستىعىن ساقتاۋعا قول جەتكىزگەنىمەن قۇتتىقتادى. پرەزيدەنت مۇنىڭ ايتۋلى وقيعا ەكەنىنە نازار اۋداردى.

– بۇل ءسىزدىڭ مەملەكەتتىلىكتى نىعايتۋعا، حالقىڭىزدىڭ ءال-اۋقاتىن كوتەرىپ، باكۋدىڭ الەمدىك قوعامداستىقتاعى بەدەلىن ارتتىرۋعا باعىتتالعان مىقتى كوشباسشىلىعىڭىزدىڭ، كورەگەن ءارى دانا ساياساتىڭىزدىڭ ارقاسىندا ىسكە استى. مەنىڭ ويىمشا، بۇل، شىن مانىندە، تاريحي وقيعا، – دەدى پرەزيدەنت.

مەملەكەت باسشىسى قازاقستان مەن ازەربايجان اراسىنداعى ءوزارا قارىم-قاتىناستىڭ  قارقىندى دامىپ كەلە جاتقانىن اتاپ ءوتتى.

– جاڭا جوبالار قولعا الىنىپ جاتىر. ءبىزدىڭ ارامىزدا ەشقانداي تۇيتكىلدى ماسەلە جوق. ءبىز – شىنايى ستراتەگيالىق سەرىكتەسپىز، ءتىپتى، كاسپي تەڭىزىنىڭ ەكى جاعىن مەكەن ەتكەن كورشىلەرمىز. ستراتەگيالىق قاتىناستاردى نىعايتۋ جانە وداقتاستىق ىنتىماقتاستىقتى تەرەڭدەتۋ جونىندەگى بىرلەسكەن دەكلاراتسيانىڭ قابىلدانۋى، سونداي-اق جوعارى مەملەكەتارالىق كەڭەستىڭ قۇرىلۋى قازاق-ازەربايجان قارىم-قاتىناسىن جاڭا دەڭگەيگە كوتەرگەن تاريحي وقيعا بولدى. مەن وزىممەن بىرگە باكۋگە تولىققاندى دەلەگاتسيا الىپ كەلدىم. ويتكەنى بۇگىنگى كەزدەسۋدە، ازەربايجان تاراپىمەن شىن مانىندە، تولىق فورماتتى، مازمۇندى كەلىسسوزدەر جۇرگىزەمىز دەپ سانايمىن. بۇل – ءوزارا قارىم-قاتىناسقا قاتىستى بىرقاتار ماسەلە بويىنشا پىكىر الماسۋ ءۇشىن جاقسى مۇمكىندىك، – دەدى مەملەكەت باسشىسى.

Abai.kz