بۇۇ باس اسسامبلەياسى ءيزرايلدى گولان شىڭىنان شىعۋعا شاقىراتىن قارار قابىلدادى.

رەزوليۋتسيا اۆتورى رەتىندە كورەي حالىق دەموكراتيالىق رەسپۋبليكاسى، كۋۆەيت، ليۆان، ماۆريتانيا، الجير، ۆەنەسۋەلا، ەگيپەت، يوردانيا، يەمەن، كاتار، سيريا اراب رەسپۋبليكاسى جانە تۋنيس تانىلدى.

سەسسيا بارىسىندا قاراردىڭ قابىلدانۋىنا 91 مەملەكەت داۋىس بەردى، ونىڭ ىشىندە قازاقستان دا بار. سەگىز ەل قارسى داۋىس بەردى، تاعى 62 ەل قالىس قالدى.

گولان شىڭدارى شامامەن 1800 شارشى شاقىرىمدى اۋماقتى قۇرايدى. 1967 جىلعى سوعىسقا دەيىن سيريانىڭ قۇرامىندا بولعان. سوعىس بارىسىندا يزرايل بيىكتىكتەردى باقىلاۋعا الىپ، كەيىن گولاندى ەۆرەي مەملەكەتىنىڭ قۇرامىنا زاڭدى تۇردە ەنگىزەتىن زاڭنامانى قابىلدادى. بۇۇ قاۋىپسىزدىك كەڭەسى بۇل قادامدى ايىپتاعان ەدى.

گولان جوتالارىندا 40 مىڭعا جۋىق ادام تۇرادى. جارتىسىنا جۋىعى ەۆرەي قونىستانۋشىلارى، قالعاندارى درۋزدار جانە ازداعان الاۋيتتەر. درۋزدار اراب حالىقتارىنا جاتادى جانە يسلامنىڭ ءبىر تارماعىن ۇستانادى.

سيريا ءالى كۇنگە دەيىن گولان جوتالارىن ءوز شەكاراسى دەپ سانايدى جانە ونى قايتارۋ يزرايلمەن بەيبىت كەلىسىمگە قول قويۋدىڭ ەڭ ماڭىزدى شارتى بولىپ تابىلادى.

Abai.kz