تۇركىستانداعى قوجا احمەت ياساۋي كەسەنەسى ارنايى كۇزەت قىزمەتىنىڭ باقىلاۋىنا وتەدى. بۇل جايىندا وبلىس اكىمى دارحان ساتىبالدى مالىمدەدى.

«ۇلتتىق قاۋىپسىزدىك قىزمەتى ياساۋي كەسەنەسىن الدەبىرەۋلەر جارىپ جىبەرمەكشى بولعانى تۋرالى رەسمي حابار تاراتقان ەدى. سودان بەرى نىساننىڭ قاۋىپسىزدىگىن جەتىلدىردىڭىزدەر مە؟ كەسەنەگە قاۋىپ تونگەنىن وبلىستىڭ قاۋىپسىزدىك ورگاندارى بىلمەي قالعان با؟ كەسەنەنى جارۋ كىمگە، نە ءۇشىن كەرەك بولدى دەپ ويلايسىز؟ قازىر ول نىسانعا ونداي قاۋىپ ءتونىپ تۇرماعانىنا قانداي دا ءبىر كەپىلدىك بەرە الاسىز با؟» – دەپ سۇرادى باق وكىلى.

اكىمنىڭ سوزىنشە، كەسەنەنىڭ قاۋىپسىزدىگى قازىر ۇكىمەت دەڭگەيىندە تالقىلانىپ جاتىر.

«كەپىلدىكتى ەشقاشان، ەشكىم بەرە المايدى. كىم، نە ويلاپ جۇرگەنىن ەشكىم بىلمەيدى عوي؟! ونداي وقيعا اقپان ايىندا بولدى. ونى ءوزىم دە باق ارقىلى ءبىلدىم. تاجىكستاننىڭ با، باسقا ەلدىڭ ازاماتى سونداي ءىس-قيمىل جاساعىسى كەلگەن دەپ ەستىدىم. ەندى ولار باسقا اعىمداعى ازاماتتار شىعار. ونىڭ كوزقاراسىن، نەگە ونداي شەشىمگە كەلگەنىن بىلمەيمىن. كەيبىرەۋلەر «سەرىك قوسۋ، تاعى باسقا نارسەلەر» دەيدى. ونىڭ نە ءۇشىن بارعانىن ايتا المايمىن»، – دەدى ايماق باسشىسى.

دارحان ساتىبالدى كەسەنە قاۋىپسىزدىگى بويىنشا ۇكىمەتكە حات جازعانىن دا ايتتى. تاريحي ورىن ستراتەگيالىق نىساندار تىزىمىنە ەنگەننەن كەيىن، ونىڭ قاۋىپسىزدىك شارالارى ارنايى كۇزەت قىزمەتى ارقىلى ىسكە اسىرىلادى.

فوتو: اشىق دەرەككوزدەن

Abai.kz