ءماجىلىس دەپۋتاتى اسحات ايماعامبەتوۆ قازاقستاندا 442 ەسكى مەكتەپ بارىن ءمالىم ەتتى. ونىڭ ايتۋىنشا، ونىڭ 239-ى ساماننان جاسالعان مەكتەپ، دەپ حابارلايدى Ulysmedia.kz.

«ماڭىزدى سۇراق. بىزدە ەسكى مەكتەپ وتە كوپ. 442 ەسكى مەكتەپ بار. ساماننان جاسالعان 239 مەكتەپ بار. قازىرگى ۋاقىتتا اپاتتىق جاعداياعى مەكتەپ سانى 52-دەن استى. ءجۇز جىلدان اسقان مەكتەپتەر كوپ. سوندىقتان، وسى مەتكەپتەردى ءتيىستى مەرزىم سايىن تەكسەرۋ ماڭىزدى. ويتكەنى وسىدان بىرنەشە جىل بۇرىن سولتۇستىك قازاقستاندا مەكتەپتە توبەسى وپىرىلىپ ءتۇستى. سول كەزدە ايتەۋىر مەكتەپتە بالالار بولعان جوق. سول سياقتى وسى مەكتەپتەردى ءبىز دەر كەزىندە تەكسەرىپ وتىرۋ كەرەك دەپ سانايمىز. 30 جىلدان اسقان مەتكەپتەردى ينۆەنتاريزاتسيا جاسالادى. ەكىنشىدەن، جىلىنا 1 مىڭ مەكتەپ جوندەۋدەن ءوتىپ جاتىر. جوندەۋدەن وتكىزگەندە ءبىرىنشى كەزەكتە ءدال وسىنداي ەسكى مەكتەپتەرگە باسىمدىق بەرىلەدى»، - دەدى اسحات ايماعامبەتوۆ بىلىم بەرۋ جانە تالىمگەرلىك ماسەلەلەرى بويىنشا زاڭعا وزگەرىستەر مەن تولىقتىرۋلار ەنگىزۋدى كوزدەيتىن زاڭ جوباسىن تالقىلاۋ بارىسىندا.

ءوز كەزەگىندە وقۋ-اعارتۋ ۆيتسە-ءمينيسترى ەدىل وسپانوۆ جاڭا مەكتەپ سالۋ بويىنشا مينيسترلىكتىڭ ناقتى جوسپارى بارىن ايتادى.

«بيىل ءتۇرلى قارجى كوزدەرىنەن، ونىڭ ىشىندە ترانسفەرتتەر مەن ءبىلىم سالاسىنىڭ ينفراقۇرىلىمىن قولداۋ قورىنان، جەكە ينۆەستيتسيا مەن جەرگىلىكتى بيۋدجەت ەسەبىنەن بىزدە 22 مەكتەپتىڭ قۇرىلىسى جوسپارلانعان. جىل سوڭىنا دەيىن وڭىرلەرمەن جۇمىس ىستەپ جاتىرمىز. 7 مەكتەپتىڭ قۇرىلىسىنا جوبالىق-سمەتالىق قۇجاتتار ازىرلەنىپ، ءبىلىم سالاسىن ينفراقۇرىلىمىن قولداۋ قورى ەسەبىنەن قارجى ءبولۋدى كوزدەپ وتىرمىز. قالعان 23 مەكتەپتىڭ ماسەلەسى «جايلى مەكتەپ» ۇلتتىق جوباسى شەڭبەرىندە شەشىلەدى»، - دەيدى ول.

فوتو: اشىق دەرەككوزدەن

Abai.kz