ەلىمىزدەگى بارلىق جوو ستۋدەنتتەرىنەن حاراسسمەنتكە قاتىستى ءانونيمدى ساۋالناما جۇرگىزىلۋى كەرەك. بۇل جىنىستىق قىسىم مەن قۋدالاۋدىڭ الدىن الۋعا مۇمكىندىك بەرەدى. قر پارلامەنتى ءماجىلىسىنىڭ دەپۋتاتى قاراقات ابدەن قر پرەمەر-ءمينيسترىنىڭ ورىنباسارى تامارا دۇيسەنوۆاعا جولداعان دەپۋتاتتىق ساۋالىندا وسىنى مالىمدەدى. سونداي-اق دەپۋتات 2024 جىلدى – تۇرمىستىق زورلىق-زومبىلىققا قارسى كۇرەس جىلى دەپ جاريالاۋدى ۇسىندى. استانا مەديتسينا ۋنيۆەرسيتەتىندە پروفەسسور-وقىتۋشىنىڭ ستۋدەنتكە جاسالعان جىنىستىق قىسىم فاكتىسىنەن كەيىن دەپۋتاتقا ءتۇرلى وقۋ ورىندارىنىڭ ستۋدەنتتەرىنەن 100-دەن اسا حات كەلىپ تۇسكەن.

«جىنىستىق قىسىمعا ۇشىراعان ەلوردالىق بويجەتكەننىڭ ىسىمەن تانىسىپ، بۇل سالادا كەمشىلىكتەردىڭ كوپتىگىنە انىق كوزىم جەتىپ وتىر. ءدال بۇگىن ەلىمىزدىڭ وقۋ ورىندارىندا قانشا حاراسسمەنت وقيعاسى ورىن العانىن ءدوپ باسىپ ايتۋ قيىن. سەبەبى ستاتيستيكا جۇرگىزىلمەيدى. ال زاڭدا حاراسسمەنت ۇعىمى اتىمەن جوق»،- دەيدى دەپۋتات ق.ابدەن

وتباسىلىق تۇرمىستىق زورلىق-زومبىلىق جانە حاراسسمەنت وقيعالارى قوعامدىق سانانى ءدۇر سىلكىندىردى. ءبىر جاڭالىقتىڭ ىزىمەن الىمجەتتىك كورگەن ستۋدەنت-قىزدار ءوز حيكايالارىن الەۋمەتتىك جەلىدە بولىسە باستادى. بۇل بەلەڭ العان قۇبىلىستى، زورلىق-زومبىلىقتىڭ قاي ءتۇرىن بولسىن، حاراسسمەنتتى دە قاتاڭ قاراپ، زاڭ جوباسىنا بىرقاتار وزگەرتۋلەر مەن تولىقتىرۋلار ەنگىزۋ قاجەت دەيدى دەپۋتاتتار. ال دەپۋتات ق.ابدەن «حاراسسمەنتكە ۇشىراۋ ىقتيمالدىعى وتە جوعارى ءبىر توپ بار، ول – ستۋدەنتتەر» دەيدى.

«اتى-شۋلى وقيعادا ستۋدەنت قىزىمىز باتىل بولىپ شىقتى»،-استانا مەديتسينا ۋنيۆەرسيتەتىندەگى جاعدايدى ەسكە العان دەپۋتات: «ەش قورىقپاستان بولعان جاعدايدى جايىپ سالدى. ءتيىستى شەشىم قابىلدانىپ، الگى حاراسسەر جۇمىستان شىعارىلدى. بىراق، ءبىز – مۇنداي ماسەلەنى ارقاشان ستۋدەنتتىڭ – باتىلدىعىنا، باسشىنىڭ – ادىلدىگىنە سەنىپ قويا المايمىز. جۇيەلى، كەشەندى شەشىمدەر كەرەك. كەشە عانا مەكتەپ ءبىتىرىپ، اۋىلدان شىعىپ كورمەگەن اقۇرپەك بالاپانداي جاپ-جاس قىزداردى قورعاۋىمىز كەرەك. يبالى، كەي-كەزى تىم ۇيالشاق، مۇمكىن، جاسقانشاق قازاق قىزى – ءوز باسىنان وتكەن وسىنداي جاعدايدى ايتا بەرمەيدى»،- دەدى.

باس پروكۋراتۋرانىڭ دەرەكتەرى بويىنشا 2023 جىلدىڭ 10 ايىندا تۇرمىستىق زورلىق-زومبىلىقتان 85 ايەل قازا تاپقان.  مەملەكەت باسشىسى بۇل ماسەلەنى جەدەل قولعا الىپ، «تارتىپسىزدىك پەن قۇقىق بۇزۋشىلىققا مۇلدەم توزبەۋشىلىك» قاعيداسىن قالىپتاستىرۋدى تاپسىردى. دەپۋتات قاراقات جاقسىلىققىزىنىڭ ايتۋىنشا، قۇقىقتىق، رۋحاني، ادامي سانانى «ءتىرىلتۋ» قاجەت، كورشىنىڭ ۇيىندەگى داۋ-دامايعا، ايەلدىڭ كومەك سۇراعان جانايقايىنا بەي-جاي قاراساق، ارىپتەس كەلىنشەكتىڭ بەت-الپەتىندەگى كوگەرگەن ىزدەرگە جاناشىرلىق تانىتپاساق زاڭدا قۇدىرەت قالمايدى.

دەپۋتات ءوز ساۋالىندا حاراسسمەنتكە قاتىستى ءانونيمدى ساۋالنامانى ەلىمىزدىڭ بارلىق جوعارى وقۋ ورىندارىندا تاۋەلسىز تۇردە وتكىزۋدى، پروفەسسورلىق-وقىتۋشىلىق قۇرام مەن بارلىق ستۋدەنت قىزدارعا حاراسسمەنتكە قاتىستى زاڭنامالىق-قۇقىقتىق تۇسىندىرمە جۇمىستارىن جۇرگىزۋدى، وقۋ عيماراتتارىن بەينەكامەرالارمەن تولىق قامتاماسىز ەتۋدى جانە جوعارى وقۋ ورىندارىنىڭ جارعىسىنا حاراسسمەنت تۋرالى ناقتى ەرەجەلەر ەنگىزۋدى قاجەتتىلىگىن جەتكىزدى.

Abai.kz