گازا سەكتورىنداعى حاماس پەن يزرايل اراسىنداعى قانقاساپ شايقاستار 2 ايدان اسا ۋاقىت جالعاسىپ، مىسىر مەن كاتاردىڭ اراعايىندىق جاساۋى ارقىلى ۋاقىتشا توقتاتىلعان ەدى. بۇل تۋرالى Mezgil.kz سايتى جازدى. 

حاماس پەن يزرايل كەلىسىمگە كەلىپ، ەكەۋارا تۇتقىندار الماسۋ، گازا سەكتورىنا گۋمانيتارلىق كومەكتەر جەتكىزۋ جۇزەگە اسىرىلىپ جاتقان-دى. اۋەلگى بويىنشا گۋمانيتارلىق ماقساتتاعى ءۇزىلىس 4 كۇنگە جاسالادى دەپ كەلىسىلگەن. كەيىن ول 2 مارتە ۇزارتىلدى. ءار جولى حاماس تارابى 7 قازاندا تۇتقىنعا تۇسىرگەن يزرايل ازاماتتارى مەن وزگە شەتەلدىك تۇتقىنداردى لەگ-لەگىمەن بوساتقان. جاۋاپ رەتىندە يزرايل تارابى 150-دەن اسا قۇدىستىق تۇتقىندى بوساتىپ جاتتى. 50/150 فورمۋلاسى بويىنشا جاسالعان تۇتقىن الماسۋ كەلىسىمىنىڭ جالعاسى رەتىندە حاماس سوعىس توقتايتىن ءار كۇننىڭ ەسەبىنە 10 تۇتقىننان بوساتادى دەگەن. وسىلايشا، گازا سەكتورىنداعى ۇرىس قيمىلدارى تۇپ-تۋرا 8 كۇنگە توقتادى.

ال كەشە، ياعني، 30 قاراشادا ەكى بىردەي مۇزداي قارۋلانعان لاڭكەس شىعىس يەرۋساليملەگى گيۆات-شاۋل جول قيىلىسىندا اۆتوبۋس ايالداماسىندا تۇرعان بەيبىت تۇرعىندارعا وق جاۋدىرعان، يزرايل قاۋىپسىزدىك كۇشتەرى ولاردىڭ كوزىن جويا ءبىلدى. بۇل تەراكت دەپ باعالاندى. سول سويقاندى جاساۋشىلار 3 ادامدى ءولتىرىپ، 7 ادامدى جارالادى.

يەرۋساليمدەگى تەررور

قۇدىستىق حاماس قوزالىسى يەرۋساليمدە بولعان تەراكتىنى ءوز مويىنا الدى. وسى تەراكتى تۋراسىندا حاماس قوزالىسى 30 قاراشادا ءوزىنىڭ «Telegram» ارناسىندا: «بۇل وپەراتسيا شەگىنە جەتكەن وككۋپاتسيامەن گازا سەكتورىنداعى جاپپاي قىرىپ-جويۋعا جاۋاپ بەرۋ بولىپ تابىلادى»، - دەپ مالىمدەمە جاسادى.

الەمدىك باق تەراكتىنى جاساۋشىلار «ال-كاسسام» بريگاداسىنىڭ ەكى مۇشەسى بولدى دەگەندى العا تارتادى.

ۋاقىتشا كەلىسىم - ءبىتىم ەمەس!

بۇگىن تاڭدا يزرايل ارمياسى گازا سەكتورىنداعى ۇرىس قيمىلدارىن قايتا باستادى. يزرايل ارمياسى: «حاماس گۋمانيتارلىق ءۇزىلىس تۋرالى كەلىسىمدى بۇزىپ، يزرايل اۋماعىن اتقىلادى. تساحال گازا سەكتورىنداعى ۇرىس قيمىلدارىن جالعاستىرادى»، - دەپ مالىمدەدى.

بۇعان دەيىن يزرايل ارمياسى ءھام اسكەري باسشىلىعى حاماس-پەن ەكىاراداعى ۋاقىتشا كەلىسىم ءبىتىم ەمەس ەكەنىن، ءۇزىلىس اياقتالعان سوڭ سوعىس ايتا جالعاساتىنىن، ءيزرايلدىڭ ماقساتى حاماس-تى ءتۇپ-تامىرىمەن جويۋ ەكەنىن ايتقان ەدى.

Abai.kz