ءماجىلىس دەپۋتاتى بولاتبەك ناجمەتدينۇلى جالپى وتىرىستا پرەمەر مينيستر ءاليحان سمايلوۆقا سۋ ماسەلەسىنە قاتىستى دەپۋتاتتىق ساۋال جولدادى.

مەملەكەت باسشىسى قاسىم-جومارت توقاەۆ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا سۋ تاپشىلىعىنىڭ ارتۋى – ورتالىق ازيا مەملەكەتتەرىنە ورتاق ماسەلە ەكەنىن جانە ەلىمىزدىڭ كەيبىر وڭىرلەرىندە سۋدى ەڭ كوپ جۇمسايتىن اۋىل شارۋاشىلىعى سالاسىندا ونىڭ 40 پايىزى بوسقا ىسىراپ بولىپ جاتقانىن ايتتى.

وسىعان وراي، بولاتبەك ناجمەتدينۇلى ءوزىنىڭ دەپۋتاتتىق ساۋالىندا AMANAT پارتياسى پرەزيدەنتتىڭ ساياساتىن قولدايتىنىن جانە ءبىزدىڭ سۋ رەسۋرستارىمىزدى ۇتىمسىز پايدالانۋعا قارسى ەكەنىن ايتتى.

ەلدىڭ سۋ رەسۋرستارىنىڭ كولەمىن جەر ءۇستى سۋلارى قامتاماسىز ەتەدى، ولاردىڭ جارتىسى قىتاي، وزبەكستان، رەسەي جانە قىرعىزستاننان ترانسشەكارالىق وزەندەردىڭ اعىنىنىڭ ارقاسىندا قالىپتاسادى. قازىرگى ۋاقىتتا سۋ رەسۋرستارى حالىق پەن ەكونوميكا سالالارىنىڭ قاجەتتىلىكتەرىن قامتىمايدى، بۇل وڭتۇستىك وڭىرلەردىڭ ودان ءارى الەۋمەتتىك-ەكونوميكالىق دامۋىنا كۇمان تۋعىزادى، – دەدى دەپۋتات.

سۋ الۋ جانە سۋارمالى سۋ بولىپ تابىلاتىن وتەلمەيتىن رەسۋرستىڭ ءونىمسىز شىعىن دەڭگەيى بويىنشا ستاتيستيكا ونى ءتيىمسىز پايدالانۋدى كورسەتەدى. جەرسەرىكتىك جەردى زوندتاۋ جۇيەلەرىنەن كۇندەلىكتى الىنعان كەڭىستىكتىك دەرەكتەر مۇنى راستايدى. سۋرەتتەردە جەردىڭ بىركەلكى سۋارىلمايتىندىعى كورىنەدى، بۇل سۋدىڭ ءار ءتۇرلى سۋارمالى القاپتارعا دۇرىس بولىنبەگەندىگىن كورسەتەدى. كەيبىر ۋچاسكەلەردە ارتىق ىلعال بار، ال كەيبىر جەرلەرگە سۋ مۇلدەم جەتپەيدى.

ارنالار مەن وزەندەردى قايتا باعىتتاۋ كەزىندە پايدا بولعان جاساندى سۋ جيناقتارى ايقىن كورىنەدى. سۋدى زاڭسىز الۋ فاكتىلەرى دە تىركەلگەن. پرەزيدەنت بىرنەشە رەت سۋ سالاسىن تسيفرلاندىرۋ تۋرالى تاپسىرما بەردى. دەگەنمەن، بۇگىنگى تاڭدا زاماناۋي ەسەپكە الۋ اسپاپتارى مەن اقپاراتتىق جۇيەلەر شىن مانىندە تەك عانا ساتباەۆ اتىنداعى كانالدا جۇمىس ىستەيدى، – دەدى دەپۋتات.

بولاتبەك ناجمەتدينۇلىنىڭ ايتۋىنشا، سۋ تاريفتەرىنىڭ تومەندىگى جانە اۆتوماتتاندىرۋدىڭ جوقتىعى ەسەپكە الۋ جۇيەسىنىڭ ءتيىمسىز بولۋىنا اكەلەدى. سۋدى ارزان ءارى باقىلاۋسىز پايدالانۋعا بولادى. بۇگىندە شارۋالار اراسىندا سۋدى ۇنەمدەيتىن تەحنولوگيالاردى ەنگىزۋدىڭ ىنتالاندىرۋشى تەتىكتەرى دە جوق. مىسالى، 1 كگ كۇرىش وندىرۋگە سۋبسيديالاردى قوسقاندا (!!!) ەگەر 2 تەڭگە باعامەن كەمىندە 6000 ليتر سۋ قاجەت بولسا، وندا سۋ ۇنەمدەۋ تەحنولوگيالارىمەن اينالىساتىندار 20-30 ەسە كوپ تولەيدى.

دەپۋتات قولدا بار سۋدى ۇنەمدەۋدى جانە تيىمدىلىكتى ارتتىرۋدى ۇيرەنۋدىڭ ورنىنا، سۋ مينيسترلىگى وزەندەردى بۇرۋمەن اينالىساتىنىن، ەلگە قانشا سۋ كەلسە دە، ونى ءتيىمسىز پايدالانعان كەزدە تاپشىلىق ساقتالاتىنى تۇسىنىكتى ەكەنىن ايتتى.

وسىعان بايلانىستى بولاتبەك ناجمەتدينۇلى قىسقا مەرزىم ىشىندە، سۋدى ۇنەمدەيتىن تەحنولوگيالاردى قولداناتىن جانە جوعارى ونىمدىلىكتى قامتاماسىز ەتەتىن جوبالاردى قوسا العاندا، باسىمدىقتاردى ايقىنداۋ قاجەت ەكەنىن ايتتى.

– عارىش مونيتورينگىنىڭ كەڭىستىكتىك دەرەكتەرى نەگىزىندە جەر پايدالانۋشىلار بويىنشا ناقتى ۋاقىت رەجيمىندە سۋدى ءتيىمدى ەسەپكە الۋدى قامتاماسىز ەتە وتىرىپ، سۋ رەسۋرستارىن ساقتاۋ جانە تاسىمالداۋ ينفراقۇرىلىمىن تسيفرلاندىرۋ. اۋىل شارۋاشىلىعىنا ارنالعان سۋ تاريفتىك ساياساتىن قايتا قاراۋ. اگرارشىلار اراسىندا، ونىڭ ىشىندە تاريفتىك ساياسات ارقىلى زاماناۋي سۋ ۇنەمدەۋ تەحنولوگيالارىن ەنگىزۋدى ىنتالاندىرۋ شارالارىن ازىرلەۋ قاجەت، – دەدى دەپۋتات.

Abai.kz