ءماجىلىس دەپۋتاتى ەرمۇرات ءباپي دەپۋتاتتىق ساۋالىندا اكتيۆتەردى قايتارۋ جونىندەگى كوميتەتتىڭ ءالى كۇنگە دەيىن قول قۋسىرىپ وتىرعانىن ايتتى، دەپ حابارلايدى Ulysmedia.kz.

ونىڭ ايتۋىنشا، سايلانعانىنا وسى قاراشادا ءبىر جىل بولعان پرەزيدەنت قاسىم-جومارت توقاەۆ ءوزىنىڭ 7 جىلدىق قۇزىرەتى اياسىندا اتقارىلۋى ءتيىس پروگراممالىق مىندەتى رەتىندە الەۋمەتتىك ادىلەتتىلىك ورناتۋ باستى ءبىر باعدارلامالىق باعىتى بولاتىنىن العاشقى جولداۋىندا جاريا ەتكەن. پرەزيدەنتتىك پارىزدى ورىنداۋ – زاڭسىز جىلىستاتىلعان اكتيۆتەردى ەلگە قايتارۋعا تىكەلەي بايلانىستى ەكەنىن دە مەملەكەت باسشىسى ءوز اۋزىمەن ايتقانى بەلگىلى.

«مىنە وسى اسا اۋقىمدى مىندەتتى ورىنداۋ ءۇشىن پرەزيدەنت ءوز جارلىعىمەن ۋاكىلەتتى ورگان – اكتيۆتەردى قايتارۋ جونىندەگى كوميتەت قۇرىعانىنا كەشە 5 جەلتوقساندا ەكى اي بولدى. سول ەكى ايدىڭ ىشىندە بۇل كوميتەتتىڭ ءىس-ارەكەتى جونىندە تىرس ەتكەن حابار جوق. كوميتەتتىڭ قىزمەتىنەن قازاقستاندىق قوعام ماقۇرىم. سوندىقتان اكتيۆتەردى قايتارۋ جونىندە زاڭ قابىلداعان دەپۋتاتتاردىڭ اسىلوۆ پەن سۇيىندىكوۆ مىرزالاردان مىناۋ سۇراقتاردىڭ جاۋابىن بىلگىسى كەلەدى:

- ەل پرەزيدەنتى بەلگىلەگەن تاپسىرمالاردى ورىنداۋ باعىتىندا كوميتەت قانداي كۇشتىك-سترۋكتۋرالىق قۇرىلىممەن جۇمىس ىستەپ جاتىر؟ بۇگىندە كوميتەتتىڭ قۇرامىندا قانشا قىزمەتكەر بار؟ ەسكە سالايىن، پرەزيدەنت العاشىندا كوميتەتتىڭ شتاتتىق سانى 130 ادام دەپ بەلگىلەگەن ەدى.

- كوميتەتتىڭ شەتەلدىك يۋريديكتسيالارمەن، حالىقارالىق ىزدەستىرۋ بيۋرولارىمەن جۇمىس ىستەيتىن بولىمىندە قانشا قىزمەتكەن جۇمىس ىستەيدى؟

- وسى وتكەن ەكى ايدىڭ ىشىندە ەلگە قايتارىلعان اكتيۆتەر بار ما؟ بولسا، ونىڭ كولەمى قانداي؟ سوڭعى ءبىر اشىق اقپاراتقا قاراعاندا، سىزدەر جامىشەۆتىڭ «قازاقستان حالقىنا» قورىنا بۇعان دەيىن تۇسكەن 850 ميلليارد تەڭگەنى مالدانىپ وتىرعان جايلارىڭىز بار سياقتى.

- سىزدەر قوعام الدىندا كوميتەتتىڭ قۇپيا ەمەس العاشقى ءىس-شارالارىن جاريا ەتىپ، كوپشىلىك الدىندا ءبىر پرەسس-كونفەرەنتسيا بەرەتىن ۋاقىت بولعان جوق پا؟»، - دەدى دەپۋتات.

ەرمۇرات ءباپي ۇرلانعان اكتيۆتەردىڭ ەلگە قايتارىلۋىن باعىپ، قازىناعا قانشا قارجى تۇسەرىن باعىپ، قۇزىرلى ورگانداردىڭ ءىس-ارەكەتتەرىن باقىلاپ وتىرعان قوعام بار ەكەنىن ۇمىتپاۋدى ەسكە سالدى.

«ۇرلانعان اكتيۆتەر ەلگە قايتادى دەگەن حالىقتىڭ ازىرگە ۇزىلمەگەن ءۇمىتى مەن سەنىمىن كۇل-پارشا قىلۋعا سىزدەردىڭ قاقىلارىڭىز جوق. ءبىز دە وعان جول بەرمەيمىز! پرەزيدەنتتىڭ پارمەنىن، قىزمەت-قارىمى مەن ەل الدىنداعى قوعامدىق بەدەلىن باعامدايتىن بۇگىنگى ءبىر ولشەم – ۇرلانعان اكتيۆتەردى ەلگە قايتارۋ ەكەنىن سىزدەرگە ەسكەرتىپ قويعىم كەلەدى!

ال ەندى باس پروكۋراتۋرا مەن ونىڭ كوميتەتى جىم-جىرت جاتقان كەزدە، «ەسكى قازاقستاننىڭ» كلەپتوكراتتارى ەل ەكونوميكاسىن قايتادان باسىپ الۋعا قام جاساۋدا. وسى ورايدا مەنىڭ قولىما جەتكەن ينسايدەرلىك اقپاراتتى (كورسەتۋ) دەپۋتاتتار الدىندا جاريا ەتىپ، «ەسكى قازاقستانعا» قىزمەت قىلماق ويى بار مۇددەلى لاۋازىمگەر ازاماتتارعا ەسكەرتۋ جاساعىم كەلەدى. جەكەلەگەن فيگۋرانتتاردىڭ اتى-ءجونىن اتاماي، بۇل اقپاراتتى قاز-قالپىندا وقىپ بەرەيىن:

مىنە، ۇرلانعان اكتيۆتەردى ەلگە قايتارادى دەپ، ءبىز سەنىم ارتقان كوميتەت ىرعالىپ-جىرعالىپ جۇرگەندە، «ەسكى قازاقستاننىڭ» ءوزى بىرتە-بىرتە ەلگە قايتا باستاعان سىڭايلى.

ال بەرىك نوعايۇلى، تيمۋر قۇلىباەۆتىڭ اتجالماندارى ۇرلاعان اكيۆتەر جونىندەگى اقپاراتتى ءسىزدىڭ وزىڭىزگە قوسىمشا جولداپ جىبەرەمىن (كورسەتۋ). «سك پەتروليۋم» سەرىكتەستىگىنەن كەلىپ تۇسكەن «قازاقستان-قىتاي مۇناي قۇبىرى» كونتسورتسيۋىمىنان (ديرەكتورى تالعات جۇمادىلداەۆ پەن ونىڭ ۇلى ابىلاي جۇمادىلداەۆقۇا قاتىستى) ۇرلانىپ، شەتەلگە تىعىلعان 300 ملن دوللار اكتيۆتى ىزدەپ قينالمايتىن بولاسىزدار!

ءسوز سوڭىنداعى سۇراعىم: قۇرمەتتى بەرىك نوعايۇلى جانە نۇرداۋلەت مىقتىبەكۇلى! جىلىستاتىلعان اكتيۆتەردى قايتارۋ زاڭىن قابىلداعان دەپۋتاتتاردىڭ الدىندا سىزدەر قاشان ەسەپ بەرمەك ويلارىڭىز بار؟»، - دەدى ءماجىلىس دەپۋتاتى.

ەسكە سالا كەتەيىك، ءماجىلىس دەپۋتاتى ەرمۇرات باپي زاڭسىز شىعارىلعان اكتيۆتەردى قايتارۋ جونىندەگى ورگانداردىڭ جۇمىسىن سىنعا العان بولاتىن.

فوتو: اشىق دەرەككوزدەن

Abai.kz