بۇل تۋرالى «حالىقارالىق «قازاق ءتىلى» قوعامى» قوعامدىق بىرلەستىگىنىڭ پرەزيدەنتى راۋان كەنجەحانۇلى حابارلادى.

«ءتىل جاناشىرلارىنان، قازاق قاۋىمىنان ءسۇيىنشى سۇرار رەتىم بار. 12 قازان كۇنى پرەزيدەنتتىڭ قابىلداۋىندا مەملەكەتتىك ءتىلدى دامىتۋعا ارنالعان ەنداۋمەنت قورىن قۇرۋدى ۇسىندىم. مەملەكەت باسشىسى ۇسىنىستى قولداعان ەدى. QAZAQ TILI Endowment قورىن قۇرۋ، تىركەۋ، راسىمدەۋ شارالارى جاقىندا اياقتالىپ، بۇگىن قاسىم-جومارت كەمەلۇلى سول قورعا ءبىرىنشى بولىپ 7 ميلليون تەڭگە كولەمىندە جەكە جارنا اۋداردى»، — دەپ جازدى ول Facebook-تە.

ونىڭ اتاپ وتۋىنشە، بۇل قوردىڭ باستى مىندەتى — مەملەكەتتىك ءتىلدى قولداۋ جانە دامىتۋمەن اينالىساتىن ەلىمىزدەگى ەڭ ءىرى ۇيىم — «قازاق ءتىلى» قوعامىنىڭ تۇراقتى ءارى ۇزاق مەرزىمدى دامۋىن قامتاماسىز ەتۋ. ەنداۋمەنت قورىنىڭ ەرەكشەلىگى — قورعا جينالعان قارجى جۇمسالمايدى. قورداعى قاراجات باسقارۋعا بەرىلەدى جانە ينۆەستيتسياعا قۇيىلادى. ينۆەستيتسيالىق قىزمەتتەن تۇسكەن تابىس «قازاق ءتىلى» قوعامىنىڭ جارعىلىق مىندەتتەرىنە جۇمسالادى.

«الەم ەلدەرىندە ءبىلىم بەرۋ مەن الەۋمەتتىك باعىتتا جۇمىس ىستەيتىن قوعامدىق ۇيىمداردىڭ تۇراقتى ءارى ۇزاقمەرزىمدى قىزمەتىن قامتاماسىز ەتۋ ءۇشىن ەنداۋمەنت قورىن قۇرۋ تاجىريبەسى كەڭ تارالعان. قازىر جاپونياداعى عىلىم مەن تەحنولوگيا قورى، سونىمەن قاتار، ستەنفورد، گارۆارد ۋنيۆەرسيتەتتەرىنىڭ قورلارى دۇنيەجۇزىندەگى ەڭ ءىرى ەنداۋمەنت قورلارىنىڭ قاتارىنا كىرەدى. قازاقستاندا دا ىرى ۋنيۆەرسيتەتتەر، مەكتەپتەر مەن كوممەرتسيالىق ەمەس ۇيىمداردىڭ ەنداۋمەنت قورلارى ءساتتى جۇمىس ىستەپ كەلەدى. QAZAQ TILI Endowment قورىن بەدەلدى قوعام قايراتكەرلەرى، عالىم-لينگۆيستەر مەن مەملەكەت وكىلدەرىنەن قۇرالعان تاۋەلسىز قامقورشىلار كەڭەسى باقىلايدى»، — دەيدى بىرلەستىك باسشىسى.

راۋان كەنجەحانۇلىنىڭ اتاپ وتۋىنشە، مەملەكەت باسشىسى «قازاق ءتىلى» قوعامىنا قازاق تىلىندەگى مەديا جانە باسپا كونتەنتىن كوبەيتۋ ءۇشىن ناقتى جوبالار مەن شارالار كەشەنىن جۇزەگە اسىرۋ، ءتىلدى وقىتۋ مەن ۇيرەتۋ ادىستەمەسىن جەتىلدىرۋ، وقۋ ساۋاتتىلىعى مەن جازۋ مادەنيەتىن دامىتۋ، سونىمەن قاتار، قازاق ءتىلىن قولداۋ مەن ءتىلدى قولداناتىن قاۋىمداستىق اياسىن كەڭەيتۋ ماقساتىندا زاماناۋي تەحنولوگيالىق شەشىمدەردى كەڭىنەن پايدالانۋدى تاپسىردى.

«پرەزيدەنت كورسەتكەن ۇلگىنى ەل ازاماتتارى، ءتىل جاناشىرلارى، كاسىپكەرلەر كەڭىنەن قولدايدى دەپ سەنەمىز. قر پرەزيدەنتى قاسىم-جومارت كەمەلۇلى توقاەۆقا انا تىلىمىزگە دەگەن ادال ازاماتتىق ۇستانىمى، كورسەتكەن زور قۇرمەتى، جەكە ۇلگىسى ءۇشىن العىس بىلدىرەمىز!»، — دەدى ول.

فوتو: اشىق دەرەككوزدەن

Abai.kz