تالاي جىل نازارباەۆ ۋنيۆەرسيتەتىنە جەتەكشىلىك ەتكەن شيگەو قاتسۋ قازاقستان حالقىنا حات جولداپ، نازارباەۆ ۋنيۆەرسيتەتىنە ارا ءتۇسۋدى سۇراپتى. ايتۋىنشا، ەكس-پرەزيدەنت نەگىزىن قالاعان وقۋ ورنىنىڭ ەسىگىنە قۇلىپ سالىنۋعا جاقىن. بۇل تۋرالى DALA INSIDE جازدى.

دەپۋتاتتار تاراپىنان سىنعا ۇشىراپ، كەم-كەتىگىن كوبەيىپ كەتكەن ۋنيۆەرسيتەتتىڭ تاعدىرى قىل ۇستىندە.

DALA INSIDE-قا بەلگىلى بولعانداي ەسكى قازاقستاننان مۇراعا قالعان وقۋ ورنى قارشا بوراعان كريتيكادان بۇگىن-ەرتەڭ قۇتىلمايدى. مۇرات ابەنوۆ باستاعان دەپۋتاتتار مەن سىرىم يتقۇلوۆ سىندى اتىشۋلى بلوگەرلەر ۋنيۆەردى توپەلەتىپ ۇرۋ تۋرالى تاپسىرما العان.

مەكەمە باسشىلىعى ءسىز بەن بىزگە ەسەپ بەرمەيدى. وسىدان 12 جىل بۇرىن نازارباەۆ ۋنيۆەرسيتەتى، نازارباەۆ مەكتەپتەرى مەن نازارباەۆا قورىنا «ايرىقشا ستاتۋس» بەرگەن زاڭ وسىناۋ وقۋ ورنىن قوعامدىق باقىلاۋدان «اراشالاپ» تۇر. سوڭعى ءۇش جىلدىڭ وزىندە ۋنيۆەردى «اسىراۋعا» 17 ملرد تەڭگەگە جەتەقابىل قارجى بولىنگەن. ال، ناتيجە قايدا؟ ۋنيۆەردى كوتەرۋگە، دامىتۋعا جۇمسالعان التىن ۋاقىت، ەسىل اقشا تەككە كەتكەن. دەپۋتات ابەنوۆتىڭ شىرىلداپ جۇرگەنى دە سودان.

«نۋ باسشىلىعى ەلەڭ-الاڭ كۇيدە ءجۇر. قارجىلاندىرۋدىڭ كۇرت كەمۋى، مەملەكەتتىڭ قولداۋدىڭ السىرەۋى، ساياسي قىسىمنىڭ كۇشەيۋى جاقسىلىققا اكەلمەيدى. الداعى اپتالاردا نازارباەۆتىڭ، كەشىرىڭىزدەر، نازارباەۆ ۋنيۆەرسيتەتىنىڭ تاعدىرى ايقىندالادى. وقۋ ورنى قۇردىمعا كەتسە، جاڭا قازاقستاننىڭ رەپۋتاتسياسىنا داق تۇسەدى. سىزدەردەن ينۆەستورلار دا تەرىس اينالادى»، - دەيدى شيگەو.

مەكەمەنىڭ ماقتاۋىن اسىرىپ، ماقالا جازعان شيگەو قاتسۋدى قوبالجىتىپ وتىرعان ءبىر فاكتور بار:

نازارباەۆ ۋنيۆەرسيتەتى قۇرىلعالى بەرى 13 جىل ءوتتى. وقۋ ورنىن ايرىقشا ستاتۋستان ايىرىپ، جاقسىلاپ اۋديت جۇرگىزەر بولسا تالاي شيكىلىك شىعارى عاجاپ ەمەس. مۇنداي جاعدايدا شيگەونىڭ باسىنا بۇلت ۇيىرىلەدى...

DALA INSIDE-قا جەتكەن مالىمەت بويىنشا الداعى كۇندەرى داريعامەن اففيرلەنگەن مەديا-رەسۋرستاردا نازارباەۆ ۋنيۆەرسيتەتىنە اراشا سۇرايتىن كونتەنت كۇرت كوبەيەدى.

ەسكى قازاقستاننىڭ داۋىرلەپ شاعىندا تۇسىندا وقۋ ورنىنىڭ باسشىلىعىنان بولەك، اتىشۋلى «جۋسان بانكتىڭ» بۇعالتەرياسىن جۇرگىزگەن شيگەو مىرزا ءبىر تىقىردىڭ تايانعانىن سەزىنە باستادى. جاپوندىق توپ مەنەدجەر ەسكى جۇيەگە قاتىستى ءبىراز بىلىقتى بىلەدى. شيەگونىڭ ميلى باسىن پايدالانعان اۋلەت ءازىر شەتەلدىك بانكتەردە ءىرىپ ءشىرىپ جاتقان قيساپسىز بايلىقتى شەتكە شىعارىپ ۇلگەردى.

Abai.kz