قازاقستان رەسپۋبليكاسى پرەمەر-ءمينيسترىنىڭ
ءبىرىنشى ورىنباسارى
سكليارعا!

اۆتور - ءماجىلىس دەپۋتاتى ەرلان بارلىباەۆ

«اق جول» دەموكراتيالىق پارتياسى وتكەن جىلىتۋ ماۋسىمىنداعى اپاتتاردى ەسكەرە وتىرىپ، بىلتىرعى جىلدىڭ 30 قاراشاسى مەن 21 جەلتوقسانىندا، سونداي-اق، 2023 جىلدىڭ 18 قاڭتارىندا ۇكىمەتكە سول اپاتتاردىڭ سالدارىن جويىپ، بولاشاقتا قايتالانباۋىنىڭ الدىن الۋ ماسەلەلەرىن كوتەرىپ دەپۋتاتتىق ساۋال جولداعان بولاتىن.

ودان بولەك، جاڭا ماۋسىمعا دايىندىق كەزەڭىندە بيىلعى جىلدىڭ 15 مامىرى، 14 ماۋسىمى جانە 4 قازانىنداعى ساۋالدارىمىزدا وسى تاقىرىپتى تاعى دا كوتەرىپ، قورىتىندى شىعارىپ، جىلۋ ەنەرگەتيكاسىن جاڭارتۋ جانە جاڭعىرتۋ بويىنشا تۇراقتى جۇمىستاردى جونگە كەلتىرۋدى ۇسىندىق.
مەملەكەتتىك ورگانداردىڭ ساۋالدارىمىزعا بەرگەن جاۋاپتارى كوڭىلگە قونىمدى بولعانىمەن، وكىنىشكە وراي، ەندى عانا باستالعان اياز كوتەرىڭكى كوڭىلدى سۋ سەپكەندەي باستى. ەندى، مىنە، بۇكىل ەل جىلۋ بەرۋ ماۋسىمىن ۇرەيلەنە باستان وتكەرىپ وتىر.

وسىعان وراي، «اق جول» دەمپارتياسى ارىپتەستەرىمىزدىڭ وسى ماسەلە بويىنشا بۇگىنگى دەپۋتاتتىق ساۋالىن قولدايدى.

قازىرگى جاعدايدا بيىلعى ماۋسىمداعى وقيعالاردىڭ قالاي ءوربيتىنىن بولجاۋ قيىن ەكەنىن تۇسىنەمىز.

سوندىقتان، ۇكىمەتتە جىلۋ-ەنەرگەتيكا سالاسىنداعى قوردالانىپ قالعان ماسەلەلەردى كەشەندى تۇردە شەشۋدىڭ ۇزاق مەرزىمدى جوسپارلارى بار ما، بار بولسا بۇل جوسپارلاردىڭ قانداي ەكەنىن حابارلاۋدى سۇرايمىز.

«اق جول» فراكتسياسىنىڭ بۇعان دەيىنگى ساۋالدارىندا دا بۇل سۇراق ءدال وسىلاي قويىلعان بولاتىن، ەندى بەلگىلى بولعانداي، سول ساۋالدارىمىزعا سەنىمسىز جاۋاپتار الىپ كەلىپپىز.

قۇرمەتپەن،

«اق جول» فراكتسياسىنىڭ دەپۋتاتتارى
ە.بارلىباەۆ
ا.پەرۋاشەۆ
د.ەسپاەۆا
ق.يسا
ا.سادىقوۆ
ە.بەيسەنباەۆ

Abai.kz