494 جەكە تۇلعانىڭ اتىندا 26 مەملەكەتتە 600-دەن استام جىلجىمايتىن مۇلىك تىركەلگەن، دەپ حابارلايدى Ulysmedia.kz.

استانا قالاسى نۇرا اۋدانى بويىنشا مەملەكەتتىك كىرىستەر باسقارماسىنىڭ ءبولىم باسشىسى رۋسلان جايكەەۆتىڭ ايتۋىنشا، 2021 جىلدان بەرى تابىس دەكلاراتسياسىن تاپسىرۋدىڭ ەكى كەزەڭى وتكەن. سونىڭ اياسىندا مىڭداعان ادام ەسەپ تاپسىردى.

"قازىرگى كەزدە 354 جەكە تۇلعانىڭ شەت ەلدەردە بانكتىك شوتى بار. سونىمەن قاتار 494 جەكە تۇلعانىڭ اتىندا 26 مەملەكەتتە 600-دەن استام جىلجىمايتىن مۇلىك تىركەلگەن", - دەدى جايكەەۆ ورتالىق كوممۋنيكاتسيالار قىزمەتىندە وتكەن بريفينگتە.

ونىڭ ايتۋىنشا، 2025 جىلدان باستاپ كامەرالىق باقىلاۋ باستالادى. ازىرشە قۇقىق قورعاۋ ورگاندارى عانا قاجەتتى اقپاراتتى الا الادى.

"مىسالى، سىبايلاس جەمقورلىققا قارسى قىزمەت بىزگە سۇراۋ سالسا، بەرە الامىز. ال جالپى زاڭ بويىنشا جەكە تۇلعانىڭ قانشا اقشاسى جانە مۇلكى بار دەگەن مالىمەت جاريالانبايدى. ونىڭ ءبارى سالىق قۇپياسىنا جاتادى", - دەپ اتاپ كورسەتتى جايكەەۆ.

قارجى مينيسترلىگى داريعا نازارباەۆا مەن نۇربول نازارباەۆتىڭ دا دەكلاراتسيا تاپسىرعانىن ايتقان.

فوتو: اشىق دەرەككوزدەن

Abai.kz