فرانتسياعا جۇمىس ساپارى اياسىندا قر مادەنيەت جانە اقپارات ءمينيسترى ايدا بالاەۆا گيمە (Guimet) مۇراجايىنىڭ پرەزيدەنتى ياننيك لينتتسپەن كەزدەستى.

كەزدەسۋ بارىسىندا ايدا بالاەۆا قازاقستان-فرانتسيا قارىم-قاتىناسى پرەزيدەنتتەر قاسىم-جومارت توقاەۆ پەن ەممانۋەل ماكروننىڭ ءوزارا ساپارلارىنان كەيىن دامۋعا جاڭا سەرپىن العانىن اتاپ ءوتتى.

فرانتسيا پرەزيدەنتىنىڭ استاناعا ساپارى اياسىندا گيمە (Guimet) شىعىس ونەرى مۇراجايىندا قازاقستاننىڭ تاريحي مۇرالارىنىڭ كورمەسىن وتكىزۋ تۋرالى الدىن الا ۋاعدالاستىققا قول جەتكىزىلدى.

ايدا بالاەۆا مەن ياننيك لينتتس اۋقىمدى شارانىڭ جاي-جاپسارىن تالقىلادى.

الەمگە ايگىلى گيمە (Guimet) مۇراجايى ازيا ونەرىنىڭ الەمدەگى ەڭ تولىق جانە ەۋروپاداعى ەڭ ۇلكەن كوللەكتسياسىنا يە.

مۇراجاي پرەزيدەنتى قويمالاردا قازاقستاننان الىنعان بىرنەشە جادىگەر بار ەكەنىن، الايدا جۇرتشىلىقتىڭ قىزىعۋشىلىعىن ەسكەرە وتىرىپ، مۋزەي قازاق مادەنيەتى مەن تاريحىن سيپاتتايتىن ماڭىزدى جادىگەرلەردى كوبىرەك ۇسىنعىسى كەلەتىنىن ايتتى.

«مۇندا ەۋروپادا، اسىرەسە فرانتسيادا ۇلى جىبەك جولىنىڭ ءبىر بولىگى بولعان دۇنيەجۇزى ايماعىنىڭ ماڭىزىن قازىر كوپ ادامدار تۇسىنەدى. شىعىس پەن باتىستىڭ، سولتۇستىك پەن وڭتۇستىكتىڭ اراسىندا مادەنيەتتەردىڭ قالاي وتكەنىن دە تۇسىنەمىز. بۇگىنگى الەمدە مادەني كەزدەسۋلەردى بەينەلەيتىن ايماقتى كورسەتە ءبىلۋ وتە ماڭىزدى. قازاقستاننىڭ ۇلى دۇنيەجۇزىلىك تاريحپەن بايلانىسى تۋرالى ايتۋ كەرەك»، – دەدى ياننيك لينتس. 

ءوز كەزەگىندە مادەنيەت ءمينيسترى «قازاق دالاسى وركەنيەتىنىڭ مادەني كودى» ۇلتتىق كورمەسىنىڭ ەكسپوزيتسياسىندا تاريح پەن مادەنيەت ءۇشىن ماڭىزى زور جانە بۇرىن شەتەلدىك كورەرمەندەرگە ۇسىنىلماعان جادىگەرلەر قويىلاتىنىن اتاپ ءوتتى.

«ارينە، كورمە ەلىمىزدىڭ باي جانە قايتالانباس مادەني مۇراسىن كورسەتىپ، مەملەكەتتەر اراسىنداعى دوستىق بايلانىستى نىعايتادى»، – دەپ اتاپ ءوتتى ايدا بالاەۆا.

Abai.kz