جۇما, 20 قىركۇيەك 2024
1276 0 پىكىر 18 جەلتوقسان, 2023 ساعات 11:56

West oil جۇمىسشىلارى 7 كۇننەن بەرى ەرەۋىلدەپ تۇر

ماڭعىستاۋ وبلىسى جەتىباي كەنتىندە West oil كومپانياسى جۇمىسشىلارىنىڭ نارازىلىق جاساپ تۇرعانىنا 17 جەلتوقساندا 7 كۇن بولدى. تۇرعىندار اۋىلعا ارنايى جاساق اكەلىنگەنىن حابارلادى.

وقيعا ورنىندا جۇرگەن ازاتتىق ءتىلشىسىنىڭ حابارلاۋىنشا، ارنايى جاساق اۋىلداعى مادەنيەت ۇيىنە شوعىرلاندىرىلعان.

جۇمىسشىلار ءۇش تالاپ ايتىپ وتىر: West Oil كومپانياسىن "قازمۇنايگازدىڭ" بالانسىنا قوسۋ، بىرىڭعاي تولەم جۇيەسىن ەنگىزۋ جانە ماتەريالدىق-تەحنيكالىق بازانى جاڭارتۋ. نارازىلىققا شامامەن 500 ادام قاتىسىپ جاتىر. نارازىلار قاقاعان ايازدا كۇنى-ءتۇنى دالادا تۇر. ولار تالاپتارى ورىندالمايىنشا تارامايتىنىن ايتادى.

17 جەلتوقساندا ەرەۋىلشىلەردى قولداپ جاڭاوزەندىكتەر كەلدى. ازاتتىقتىڭ تىكەلەي ەفيرىندە ولار جۇمىسشىلار ورىندى تالاپتار قويىپ وتىر، بيلىك حالىقتىڭ تالابىنا قۇلاق اسسىن، جۇمىسشىلاردى قۋدالاماسىن دەدى.

"مۇنداعى جۇمىسشىلاردىڭ ارقايسىسىنىڭ 4-5-تەن بالاسى بار. الاتىن جالاقىلارى ماردىمسىز. جۇمىستارى اۋىر. ايدان ايعا ارەڭ كۇن كورىپ وتىر. بيلىك ءبىر اي مۇنايشىنىڭ ەتىگىن كيىپ، وسىلاردىڭ ءومىرىن ءسۇرىپ كورسىن" دەدى جاڭاوزەندىكتەردىڭ ءبىرى، ون بالانىڭ اناسى.

West Oil Software ءوز تالاپتارىن بىلتىر قازاندا دا كوتەرگەن. سودان بەرى ولاردىڭ ەڭبەك داۋى جالعاسىپ كەلە جاتىر.

"قازمۇنايگازدىڭ" ەنشىلەس كاسىپورنى Oit Transport corporation جشس - 2002 جىلى "بوزاششى تەحنولوگيالىق ترانسپورتى", "جەتىباي تەحنولوگيالىق ترانسپورتى", "ماڭعىستاۋ تەحنولوگيالىق ترانسپورتى" كاسىپورىندارى مەن "اراي" كاسىپورنىن بىرىكتىرۋ ارقىلى قۇرىلعان.

2018 جىلى بوزاششى تەحنولوگيالىق ترانسپورت باسقارماسى "بوزاششىترانسقۇرىلىس" جانە West Oil Software كومپانياارىنا سەنىمدى باسقارۋعا بەرىلگەن.

دەرەككوزى: centralasian.org

Abai.kz

0 پىكىر