Sergek ينتەللەكتۋالدى جۇيەسى جاياۋ جۇرگىنشىلەر وتكەلدەرىندە ادامداردى ەلەمەيتىن جۇرگىزۋشىلەردى تىركەيتىن بولادى. پيلوتتىق جوبا الماتىدا ىسكە قوسىلدى. بۇل تۋرالى Polisia.kz حابارلايدى. 

«تالداۋ كورسەتكەندەي، وسى جىلدىڭ 11 ايىندا اۆتوكولىك دوڭگەلەكتەرىنىڭ استىندا 556 جاياۋ جۇرگىنشى قازا تاپتى، ونىڭ 478-ءى جاياۋ جۇرگىنشىلەر وتكەلىندە. جۇرگىزۋشى ءتارتىبىن ارتتىرۋ ولىممەن اياقتالعان جول اپاتتارىنىڭ ازايۋىنا ىقپال ەتەدى»، – دەدى قر ءىىم اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا.

بۇزۋشىلىقتار قر اقبتك-ءنىڭ 600-بابىنا سايكەس «جاياۋ جۇرگىنشىلەردىڭ نەمەسە جول قوزعالىسىنىڭ وزگە دە قاتىسۋشىلارىنىڭ جۇرۋىنە باسىمدىق بەرمەۋ» تىركەلەدى. مىسالى، ەگەر اۆتوكولىك جاياۋ جۇرگىنشىدەن كەيىن جۇرسە، بۇل جول ءجۇرىسى قاعيداسىن بۇزۋ بولىپ سانالمايدى.

ال ەگەر جۇرگىزۋشى جاياۋ جۇرگىنشىگە جول بەرمەسە جانە توقتاماسا، وعان ايىپپۇل سالىنادى. ەگەر جاياۋ جۇرگىنشى دە، كولىك قۇرالى دا ءبىر قيىلىسۋ ايماعىندا بولسا، بۇل اكىمشىلىك قۇقىق بۇزۋشىلىق بولىپ تىركەلەدى.

«ءبىزدىڭ ينتەللەكتۋالدى جۇيە جول ءجۇرىسى قاعيدالارىن بۇزۋدى تىركەپ قانا قويماي، جول-كولىك وقيعالارىنىڭ الدىن الىپ، ىقتيمال قاۋىپتى جۇرگىزۋشىلەردى انىقتايدى. جاڭاشىلدىقتاردىڭ ءبىرى – جاياۋ جۇرگىنشىلەردى وتكىزبەيتىن جۇرگىزۋشىلەردى تىركەۋ»، – دەپ اتاپ ءوتتى ازىرلەۋشىلەر.

سونىمەن قاتار ينتەللەكتۋالدى جۇيە پيلوتتىق رەجيمدە جۇرگىزۋشى مەن كولىك قۇرالىنىڭ الدىڭعى ورىندىقتارىنىڭ جولاۋشىلارىندا بەكىتىلمەگەن قاۋىپسىزدىك بەلدىگى سياقتى بۇزۋشىلىقتاردى تىركەيدى.

فوتو: polisia.kz 

Abai.kz